بيىل حالىقتىڭ الەۋمەتتىك وسال توپتارىنان 400 مىڭنان استام بالا مەكتەپ فورماسىمەن، مەكتەپكە قاجەت كەرەك-جاراقتارىمەن قامتاماسىز ەتۋگە ماتەريالدىق كومەكپەن قامتىلاتىن بولادى.
400 مىڭنان اسا بالا مەكتەپكە دايىندالۋ ءۇشىن ماتەريالدىق كومەك الادى، - دەپ حابارلايدى Almaty-akshamy.kz ءتىلشىسى وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
ءار ءبىلىم الۋشىعا كيىم، وقۋ قۇرالدارىن ساتىپ الۋعا ارنالعان قاراجاتتىڭ ەڭ تومەنگى مولشەرى - 40 567 تەڭگە. بارلىق اقشا اۋدارىمدارى اتا-انالاردىڭ كارتوچكالىق شوتتارى ارقىلى جۇزەگە اسىرىلادى.
قاراجات اتا-انالارعا بالالارمەن بىرگە مەكتەپ فورماسىن، اياق كيىمدى، كەڭسە تاۋارلارىن وزدەرى تاڭداپ الۋ ءۇشىن بەرىلەدى.
مۇقتاج وتباسىلارعا ماتەريالدىق كومەك كورسەتۋ جانە بالالاردى 100 پايىز قامتاماسىز ەتۋ ءۇشىن جالپىعا بىردەي مىندەتتى ورتا ءبىلىم بەرۋ قورى جۇمىس ىستەيدى. قوردىڭ اتاۋى - "جالپىعا بىردەي وقىتۋ". قور ارقىلى اتاۋلى الەۋمەتتىك كومەك الاتىن وتباسىلاردان شىققان بالالارعا، سونداي-اق جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن وتباسىلاردان شىققان بالالارعا ماتەريالدىق كومەك كورسەتەدى.
جاڭا وقۋ جىلى قارساڭىندا جەتىم جانە اتا-اناسىنىڭ قامقورلىعىنسىز قالعان بالالار، توتەنشە جاعدايعا تاپ بولعان وقۋشىلار قارجىلاي كومەك الادى. ونىڭ ىشىندە اباي وبلىسىنداعى اپاتتان قازا تاپقان ورمانشىلاردىڭ بالالارى بار.
ايتا كەتەيىك، بىلتىر مەكتەپ جيىنتىعىن ساتىپ الۋ سوماسى 17 مىڭ تەڭگەدەن باستالعان بولاتىن.