وسى جەردە ءار ءجاسوسپىرىم ءوزىن تولعاندىرعان سۇراقتى قويىپ، مامانداردان كەڭەس الا الادى.
«Saulyq Life» اتتى تەلەگرام-بوت ىسكە قوسىلدى، - دەپ حابارلايدى Almaty-akshamy.kz قازاقپاراتقا سىلتەمە جاساپ.
بارلىق قىزمەت ءتۇرى تەگىن كورسەتىلەدى. بۇل باستاما «جاستار دەنساۋلىعىن ساقتاۋ» الەۋمەتتىك جوباسى اياسىندا جۇزەگە اسۋدا. ماماندار ەرتە جۇكتىلىك، تۇسىك جاساتۋ سىندى پروبلەمالاردىڭ الدىن الۋ ماقساتىندا وسىنداي جوبانى قولعا العان. مامىر ايىندا قولعا الىنعان شارا اياسىندا استانا مەن قىزىلوردا قالالارىنان 100-دەن استام ەرىكتى ارنايى وقۋدان وتكەن.
ايتا كەتەيىك، «جاستار دەنساۋلىعىن ساقتاۋ» جوباسى اقپارات جانە قوعامدىق دامۋ مينيسترلىگىنىڭ قولداۋىمەن باستاۋ الدى. 2025 جىلعا دەيىن جالعاسادى.
«بىرىنشىدەن، جاستاردىڭ اراسىندا اقپاراتتىق جۇمىس جۇرگىزەمىز. وسى ايتىلعان ماسەلەلەردىڭ الدىن الۋ بويىنشا. ەكىنشىدەن، ءبىز ۆولونتەرلىك ۇيىم قۇردىق. ۆولونتەرلىك ۇيىم تەڭ-تەڭىمەن قاعيداتىمەن جاستاردىڭ اراسىندا كەڭ اقپاراتتىق جۇمىستار جۇرگىزەدى»،- دەدى «جاستار دەنساۋلىعىن ساقتاۋ» الەۋمەتتىك جوباسىنىڭ جەتەكشىسى قانات مىرحايداروۆ.