جىل باسىنان بەرى رەسپۋبليكالىق بيۋدجەتتەن 2 ترلن 803 ملرد تەڭگە سوماسىنا زەينەتاقى تولەندى، ونىڭ ىشىندە بازالىق زەينەتاقى تولەۋگە – 882،8 ملرد تەڭگە، ىنتىماقتى زەينەتاقى تولەۋگە – 1 ترلن 920،2 ملرد تەڭگە قاراستىرىلدى.
2024 جىلعى 1 قازانداعى جاعداي بويىنشا زەينەتكەرلەر سانى – 2 ملن 413 مىڭ ادام، دەپ حابارلايدى aqshamnews.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
2024 جىلعى 1 قازانداعى جاعداي بويىنشا جيىنتىق زەينەتاقىنىڭ ورتاشا مولشەرى 131 810 تەڭگەنى قۇرادى، ونىڭ ىشىندە ىنتىماقتى زەينەتاقى مولشەرى – 89 211 تەڭگە، بازالىق زەينەتاقى – 42 599 تەڭگە.
2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ، ءاربىر الۋشىعا جەكە تاعايىندالاتىنىن ەسكە سالامىز.
بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى (بۇدان ءارى – مزج) تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.
ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا، سونداي-اق مۇلدە بولماسا، بازالىق زەينەتاقى ەڭ تومەن كۇنكورىس دەڭگەيىنىڭ 65%-نا تەڭ بولسا، سودان كەيىن 10 جىلدان اسقان ءاربىر جىل ءۇشىن ونىڭ مولشەرى 2 %-عا ارتادى. مىسالى ەڭبەك ءوتىلى 20 جىل بولسا، بازالىق زەينەتاقى ەڭ تومەن كۇنكورىس دەڭگەيىنىڭ 85 %-ىن قۇرايدى. ەڭبەك ءوتىلى 30 جىل نەمەسە ودان كوپ بولسا، كۇنكورىس دەڭگەيىنىڭ ەڭ جوعارعى مولشەرىندە، ياعني 105% بەلگىلەنەدى.
ەگەر ءبىر اي ىشىندە مىندەتتى زەينەتاقى جارنالارى ءبىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى.
وسىلايشا مىندەتتى زەينەتاقى جارنالارى نەعۇرلىم تۇراقتى جانە تولىق كولەمدە اۋدارىلاتىن بولسا، زەينەتكەرلىك جاسقا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.
ءوز كەزەگىندە، ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدەگى ورتاشا ايلىق تابىسىنا بايلانىستى بولادى.