قازاقستان جىل باسىنان بەرى رەسەي، قىرعىزستان جانە اۋستراليانىڭ قۇزىرەتتى ورگاندارىمەن بىرلەسىپ ەسىرتكىگە قارسى 47 وپەراسيا وتكىزدى.
ۇقك مالىمەتىنشە، وپەراسيالار ناتيجەسىندە ەسىرتكى تاسىمالىنىڭ 8 حالىقارالىق جانە 14 وڭىرلىك ارنالارى جويىلدى، دەپ حابارلايدى Almaty-akshamy.kz.
«اتاپ ايتقاندا، اۋعانستاننان قازاقستانعا كونتراباندالىق جولمەن 5 كگ گەروين جانە 48 كگ مەتامفەتامين جەتكىزۋدى ۇيىمداستىرعان شەتەلدىك ازامات ۇستالدى. اۋعان وپياتتارىن ەسىرتكى ترافيكتەرىن قالىپتاستىرۋ ەلدەرىنەن قازاقستانعا كونتراباندالىق جولمەن تاسىمالداۋعا قاتىسى بار ەسىرتكى توبى ارەكەتىنىڭ جولى كەسىلدى. 1 كگ گەروين، 2 كگ اپيىن جانە 14 كگ گاشيش تاركىلەندى»، – دەلىنگەن حابارلامادا.
سونداي-اق، كاسپيي سۋ ايدىنى ارقىلى يراننان قازاقستانعا وپياتتاردى جەتكىزۋدىڭ تۇراقتى ارناسى جويىلدى. جىلدام قايىقتاردى پايدالانىپ، كونتراباندالىق جولمەن 30 كگ اپيىن جانە 100 مەتادون تابلەتكالارىن جەتكىزگەن ءتورت شەتەلدىك ۇستالدى.
بيىلعى جىلدىڭ ءبىرىنشى توقسانىنىڭ وزىندە 8 اۋقىمدى ەسىرتكى زەرتحاناسى جويىلىپ، زاڭسىز اينالىمنان 73 كگ «مەفەدرون» جانە 223 كگ «α-PVP» پسيحوتروپتىق زاتى الىندى.
«ەگەر بۇرىن سينتەتيكا ءوندىرىسى الماتى جانە سولتۇستىك وبلىستارعا ءتان بولسا، بۇگىندە ولاردىڭ ورنالاسۋى بىرتىندەپ باسقا ايماقتارعا تارالۋدا. مىسالى، تۇركىستان وبلىسىندا كورشى ەلدەردىڭ ەسىرتكى نارىعىنا جەتكىزۋگە ارنالعان پسيحوتروپتىق زاتتاردىڭ شەتەلدىكتەر ۇيىمداستىرعان اۋقىمدى ءوندىرىسىنىڭ ارەكەتى توقتاتىلدى. سونداي-اق، شىمكەنت قالاسى مەن جامبىل وبلىسىندا ءوز ونىمدەرىمەن ىشكى ەسىرتكى نارىعىن قامتاماسىز ەتىپ كەلگەن ءىرى ەسىرتكى زەرتحانالارى تابىلدى. اتالمىش «ديزاينەرلىك ەسىرتكىلەردى» ءوندىرۋ الاڭدارىنىڭ ورنالاسۋى مەن ساتىلۋى بويىنشا ەلىمىزدىڭ مەگاپوليستەرى ءالى كۇنگە دەيىن الدىڭعى قاتاردا ەكەنىن ايتىپ ءوتۋ كەرەك»، – دەپ ءمالىم ەتتى ۇقك.
جىل باسىنان بەرى ەسىرتكى قۇرىلىمدارىنىڭ 67 قاتىسۋشىسى ۇستالعان. زاڭسىز اينالىمنان 483،2 كگ پسيحوتروپتىق زاتتار، 11 كگ گەروين، 32،8 كگ اپيىن، 63،7 كگ گاشيش، 41،6 كگ ماريحۋانا جانە 17 توننادان استام كوكنار شيكىزاتى، سونداي-اق 22 توننادان استام حيميالىق رەاگەنتتەر الىندى.