الماتى قالاسى اكىمدىگىنىڭ قولداۋىمەن، نەاپول (يتاليا) قالاسىندا الماتى قالاسى تاريحى مۋزەيىنىڭ قازاقستان رەسپۋبليكاسىنىڭ يتالياداعى ەلشىلىگىمەن بىرلەسىپ ۇيىمداستىرىلعان «قازاقستان كوشپەندىلەرى: تاريحى مەن بۇگىنى» اتتى كورمەسى اشىلدى.
اشىلۋ سالتاناتىنا TURKSOY حالىقارالىق ۇيىمىنىڭ باس حاتشىسى سۇلتان رايەۆ، قر-نىڭ يتالياداعى توتەنشە جانە وكىلەتتى ەلشىسى ەربولات سەمبايەۆ، نەاپول قالاسىنىڭ مەرى گاەتانو مانفرەدي، قر-نىڭ يتالياداعى قۇرمەتتى كونسۋلى ۆالەنتينا ماسسا حانىم جانە باسقا دا رەسمي تۇلعالار قاتىستى. قىزىقتى ارتەفاكتىلەردەن باسقا، قوناقتارعا قازاق حالقىنىڭ ۇلتتىق تاعامدارى ۇسىنىلدى.
قازاقستان مەن يتاليانى تەك ساياسات پەن ەكونوميكا عانا ەمەس، سونىمەن قاتار ۇلى جىبەك جولى داۋىرىنەن باستاۋ العان تاريح پەن ايگىلى ۆەنەسيالىق كوپەس ماركو پولونىڭ ۇلى دالانىڭ شەكسىز كەڭىستىگى ارقىلى جاساعان ساياحاتتارى جاقىنداستىرادى. يتاليامەن ديپلوماتيالىق قاتىناستار 1992 جىلى 21 تامىزدا ورناعان. قازاقستاننىڭ يتالياداعى مادەنيەت كۇندەرى العاش رەت 2013 جىلى وتكىزىلدى. قازاقستان مادەنيەتىن الەمدىك مادەني كەڭىستىككە ينتەگراسيالاۋدىڭ ماڭىزى زور، ويتكەنى بۇل قۇندىلىقتار الماسۋعا، مادەني ارتۇرلىلىكتى كەڭەيتۋگە جانە حالىقتار اراسىنداعى ءوزارا تۇسىنىستىكتى نىعايتۋعا ىقپال ەتەدى.
ال اتالمىش كورمەنىڭ ماقساتى – قازاقستان مەن يتاليا اراسىنداعى مادەني بايلانىستاردى ودان ءارى نىعايتۋ، سونداي-اق ۇلى دالا حالقىنىڭ تاريحىمەن، كوشپەندىلەر مادەنيەتىمەن، اتاپ ايتقاندا كوشپەلى قازاقتاردىڭ داستۇرلەرىمەن، تۇرمىسىمەن، فيلوسوفياسىمەن جانە دۇنيەتانىمىمەن تانىستىرۋ.
نەاپول قالاسىنىڭ Castel Nuevo قامالىندا ۇيىمداستىرىلعان «قازاقستان كوشپەندىلەرى: تاريحى مەن بۇگىنى» كورمەگە بىرلەستىك قورىنان 140-تان استام ەكسپونات قويىلدى. بىرلەستىك مۋزەيلەرىنىڭ قورى مەن كوللەكسيالارى ۇنەمى جاڭا ارتەفاكتىلەرمەن تولىقتىرىلىپ وتىرادى. ءبىزدىڭ مۋزەيلەر تاريحي جادىگەرلەردى ساقتاپ جانە ناسيحاتتاپ قانا قويماي، ءعىلىمي-بىلىم بەرۋ ورتالىقتارىنىڭ قىزمەتىن دە اتقارادى.
كورمە ءوتىپ جاتقان جەردىڭ تاريحى دا قىزىقتى. Castel Nuevo (انجۋي قامالى) – انجۋيلىق چارلز Iء-نىڭ قۇرمەتىنە سالىنعان ساراي. ول نەاپول قالاسىنىڭ ورتالىعىندا ورنالاسقان. شەتەلدەن تۋريستەر ەڭ كوپ باراتىن ورىنداردىڭ ءبىرى. عيماراتتىڭ بيىكتىگى 50 مەتردەن اسادى.
– الماتى قالاسى مۋزەيلەر بىرلەستىگى قازاقستاننىڭ قوعامدىق جانە مادەني ومىرىنە بەلسەندى قاتىسىپ ءجۇر. ونىڭ ۇلەسىندە 2022-2023 جىلدارى ەرەكشە دامىعان حالىقارالىق ىنتىماقتاستىقتىڭ كەڭ باعدارلاماسى بار. ماسەلەن، بۇعان دەيىن سەۋل (كورەيا رەسپۋبليكاسى)، ستامبۋل (تۇركيا) قالالارىندا ۇلكەن جەتىستىكپەن وتكىزىلگەن حالىقارالىق كورمەلەردى اتاۋعا بولادى. ءبىزدىڭ شاھاردان يتاليا تورىنە جەتكىزىلگەن قۇندى جادىگەرلەر اراسىندا كيىز ءۇي جابدىقتارى، ات ابزەلدەرى، تۇرمىستىق زاتتار، زەرگەرلىك بۇيىمدار، مۋزىكالىق اسپاپتار بار. يتاليا كورەرمەندەرىنىڭ ىقىلاسى كەرەمەت! ولار ءبىزدىڭ جادىگەرلەردى ءبىر اي بويىنا تاماشالاي الادى، – دەيدى الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا.