الماتى وبلىسىندا تالعارداعى جانجال كەزىندە قايتىس بولعان 16 جاسار شەرزات بولاتتىڭ ءۇي ورتەندى، دەپ حابارلايدى aqshamnews.kz.
تجد مالىمەتىنە سايكەس، 12 قازان كۇنى ساعات 00:50-دە ءۇيدى جالىن شارپىعان. ءورت 01:38 وقشاۋلانىپ، ساعات 01:43-دە تولىعىمەن جويىلعان.
- قۇرباندار مەن زارداپ شەككەندەر جوق. ءورتتىڭ سەبەبىن انىقتاۋ ءۇشىن الماتى وبلىسى تجد زەرتتەۋ سىناق ءورت زەرتحاناسى مەن انىقتاۋ ءبولىمىنىڭ قىزمەتكەرلەرى وقيعا ورنىندا، - دەپ حابارلادى تجد.
الماتى وبلىسىنىڭ پوليسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعالعانىن حابارلادى. قازىرگى ۋاقىتتا كۋاگەرلەردەن جاۋاپ الىنىپ، سونداي̆-اق بەي̆نەباقىلاۋ كامەرالارىنىڭ جازبالارى زەرتتەلىپ جاتىر.
سونداي-اق پوليسيا مالىمەتىنە سايكەس، مارقۇم شەرزات بولاتتىڭ وتباسى پوليسيا قىزمەتكەرلەرىنىڭ قورعاۋىنا الىنعان.
- كەلىپ تۇسكەن ارىزعا سايكەس 4 قازانعا قاراعان ءتۇنى تالعار اۋدانىندا قازا تاپقان كامەلەتكە تولماعان بالانىڭ وتباسى كۇزەتپەن قامتاماسىز ەتىلگەن. وتباسىنىڭ تۇرعىلىقتى جەرى بويىنشا قاۋىپسىزدىكتى قامتاماسىز ەتۋ ءۇشىن پوليسيا قىزمەتكەرلەرىنىڭ تاراپىنان تاۋلىك بويى كەزەكشىلىگى ۇيىمداستىرىلدى، - دەپ حابارلادى وبلىستىق پد باسپا ءسوز قىزمەتى.
تالعاردا ولتىرىلگەن 16 جاستاعى شەرزاتتىڭ وتباسىنىڭ ءۇيىن ورتەۋ فاكتىسى بويىنشا قىلمىستى اشۋ ماقساتىندا باس پروكۋراتۋرانىڭ باسشىلىعىمەن 12 قازاندا ۆەدومستۆوارالىق جەدەل-تەرگەۋ توبى قۇرىلدى.
«كىنالىلەردى انىقتاپ، جازاعا تارتۋ ءۇشىن بارلىق شارالار قابىلداناتىن بولادى. قىلمىستىق ءىس قازاقستان رەسپۋبليكاسىنىڭ باس پروكۋرورىنىڭ باقىلاۋىنا الىندى»، — دەپ حابارلادى ۆەدومستۆو.
ەسكە سالايىق، بۇعان دەيىن بۇعان دەيىن 4 قازان كۇنى تالعار قالاسىنداعى توبەلەستەن ءجاسوسپىرىم قايتىس بولعان ەدى.