قوعام قايراتكەرىنىڭ قازاسىنا بايلانىستى ەلباسى نۇرسۇلتان نازاربايەۆ پەن ق ر پرەزيدەنتى قاسىم-جومارت توقايەۆ كوڭىل ايتۋ جەدەلحاتىن جولدادى
بۇگىن بەلگىلى مەملەكەت جانە قوعام قايراتكەرى تەمىرحان دوسمۇحامبەتوۆ ومىردەن وزدى، دەپ حابارلايدى Almaty-akshamy.kz «حابار 24»-كە سىلتەمە جاساپ.
مارقۇمنىڭ وتباسى مەن تۋعان-تۋىستارىنا مەملەكەت باسشىسى قاسىم-جومارت توقايەۆ پەن ەلباسى نۇرسۇلتان نازاربايەۆ كوڭىل ايتۋ جەدەلحاتىن جولدادى.
قۇجاتتا تەمىرحان مىڭايدار ۇلى سانالى عۇمىرىن ەل يگىلىگى جولىندا قىزمەت ەتۋگە ارناپ، تاۋەلسىزدىگىمىزدىڭ تۇعىرلى بولۋىنا زور ۇلەس قوسقان تۇلعا ەكەنى ايتىلعان.
«ول ءبىرقاتار جوعارى لاۋازىمدا ابىرويلى جۇمىس اتقارىپ، تۋريزم جانە سپورت، زاڭ شىعارۋ سالاسىنىڭ دامۋىنا، ەلوردامىزدىڭ كوركەيۋىنە بار قاجىر-قايراتىن جۇمسادى. كەيىننەن كاسىپكەرلىكپەن اينالىسىپ، اۋىل شارۋاشىلىعىنىڭ وركەندەۋىنە اتسالىستى. بىلىكتى باسشى، پايىم-پاراساتى بيىك ازامات رەتىندە ءاردايىم ەسەلى ەڭبەك ەتىپ، كوپشىلىكتىڭ ىزەت-ىلتيپاتى مەن قۇرمەتىنە بولەندى»، – دەلىنگەن ەلباسى جەدەلحاتىندا.
نۇرسۇلتان نازاربايەۆ تەمىرحان مىڭايدار ۇلىنىڭ جارقىن بەينەسى جۇرتشىلىق جادىندا ءاردايىم ساقتالاتىنىنا سەنىم ءبىلدىردى.