بيىل قازاقتىڭ قارا ولەڭىن كيە تۇتقان، اسىل جىرلارىمەن قالىڭ جۇرتشىلىقتىڭ ماحابباتىنا بولەنگەن اقىن جامبىل جابايەۆتىڭ تۋعانىنا 175 جىل. اتاۋلى مەرەيتوي جانە قالا كۇنى قارساڭىندا الماتى قالاسى قوعامدىق دامۋ باسقارماسى «رۋحاني جاڭعىرۋ» جوبالىق كەڭسەسىنىڭ ۇيىمداستىرۋىمەن «ءجۇز جاساعان جامبىل» Open Air جوباسى اياسىندا ءبىرقاتار ءىس-شارالار ءوتتى.
شارا قالاداعى جامبىل جابايەۆ ەسكەرتكىشى الدىنداعى اشىق الاڭدا «جىر الىبى جامبىل» اتتى جامبىل وقۋلارىمەن باستالدى. قالا مەكتەپتەرىنىڭ وقۋشىلارى ءسوز ونەرىنىڭ شەبەرى جامبىل جابايەۆتىڭ ولەڭدەرىن مانەرلەپ وقىدى.
«رۋحاني جاڭعىرۋ» جوبالىق كەڭسەسىنىڭ رەسمي وكىلى گۇلسىم ساعاتباي قىزىنىڭ ايتۋىنشا، قالا مەكتەپتەرىنىڭ وقۋشىلارى، جالپى، وسكەلەڭ ۇرپاق جامبىل اقىننىڭ مەرەيتويىندا عانا ەمەس، باسقا ۋاقىتتا دا ۇلى ەسىمدى دارىپتەپ، ولەڭدەرىن جاتقا ءبىلۋ كەرەك. جامبىل وقۋلارىنا قاتىسقان ءسوز ونەرىن تۇسىنەتىن وقۋشىلار باردا اقىننىڭ مۇراسى ماڭگىلىككە ساقتالادى.
دانيار الييەۆ، الماتى قالاسى مادەنيەت باسقارماسى باسشىسىنىڭ ورىنباسارى:
- ۇلى جامبىلدىڭ شىعارماشىلىق مۇراسىن، ونەگەلى ءومىرىن ناسيحاتتاۋ ماقساتىندا قالالىق ورتا ءبىلىم وقۋشىلارى اراسىندا وتكەن شىعارماشىلىق ءىس-شارانى الماتى قالاسى اكىمدىگىنە قاراستى «رۋحاني جاڭعىرۋ» جوبالىق كەڭسەسى ۇيىمداستىردى. وسىنداي رۋحاني شارالار ارقىلى جامبىل جابايەۆتىڭ شىعارماشىلىعىمەن ءاربىرىمىز تانىس بولۋىمىز كەرەك. اقىننىڭ رۋحتى كوتەرەتىن، وتانعا دەگەن ماحابباتتى، ەلگە دەگەن سۇيىسپەنشىلىكتى ارتتىراتىن ولەڭدەرى ارقىلى جاستاردىڭ بويىنا رۋحتى قاسيەتتەردى سىڭىرگەن ءجون.
سونىمەن قاتار، ع.مۇسىرەپوۆ اتىنداعى قازاق اكادەميالىق بالالار مەن جاسوسپىرىمدەر تەاترى الدىنداعى اشىق الاڭ ساحناسىندا جاس اقىنداردىڭ قاتىسۋىمەن «جامبىل – مەنىڭ جاي اتىم...» اتتى ايتىس ءوتتى. جوبانىڭ نەگىزگى ماقساتى – ۇلى جامبىلدىڭ شىعارماشىلىق باي مۇراسىن كەڭ كولەمدە ناسيحاتتاۋ، بۇگىنگى وسكەلەڭ جاس ۇرپاقتىڭ ايتىس ونەرى ارقىلى پاتريوتتىق سەزىمىن وياتىپ، وتانسۇيگىشتىككە باۋلۋ. ايتىسقا ءتۇرلى جاس اقىندار ايتىسىنىڭ جۇلدەگەرلەرى قاتىستى.
بۇگىنگى ءىس-شارا «ءجۇز جاساعان جۇرەكتەن...» اتتى تەاترلاندىرىلعان قويىلىممەن اياقتالدى. قويىلىمدى ع.مۇسىرەپوۆ اتىنداعى قازاق اكادەميالىق بالالار مەن جاسوسپىرىمدەر تەاترىنىڭ اكتەرلەرى، ستۋدەنتتەر مەن جاس اكتەرلەر قويدى.
دارحان بالاجانوۆ، جوبا ۇيىمداستىرۋشىسى:
- نەگىزگى ماقسات – جامبىلدىڭ جىرىن كەڭىنەن ناسيحاتتاۋ. Open Air جوباسى اياسىندا اشىق اسپان استىندا ءۇش جوبا وتكىزىلدى. ونىڭ ءبىرى – قويىلىم. تەاترلاندىرىلعان قويىلىمدا اقىننىڭ ءومىرىن كەزەڭ-كەزەڭىمەن كورسەتتىك. ياعني دۇنيەگە كەلگەن كەزەڭى، بوزبالا شاعى، ءسۇيىنبايدان باتا الاتىن كەزى، ايكۇمىسپەن ايتىسى بار. سوڭىندا توقساندى القىمداعان جامبىلمەن قويىلىمدى اياقتايمىز. شاعىن قويىلىمدا اقىننىڭ ءومىرىن قامتۋعا تىرىستىق. سونىمەن قاتار، اقىننىڭ ەل-جۇرتىنا ايتقان ولەڭدەرى مەن وسيەتتەرىن كىرىستىردىك.