TikTok ينتەرفەيسىنە قازاق ءتىلىن ەنگىزۋ جانە قازاقشا كونتەنتتى بىرلەسە دامىتۋ ۇسىنىلدى.
جۋىردا قازاقستاندا TikTok-تىڭ ءوفيسى اشىلادى. بۇل تۋرالى اقپارات جانە قوعامدىق دامۋ ءمينيسترى دارحان ءقىدىرالى فەيسبۋكتەگى پاراقشاسىندا جازدى، دەپ حابارلايدى Almaty-akshamy.kz.
الەۋمەتتىك جەلىدە مينيستر TikTok كومپانياسىنىڭ ۆيسە-پرەزيدەنتى تەو بەرتراممەن كەزدەسكەنىن حابارلادى.
«كەزدەسۋدە TikTok ينتەرفەيسىنە قازاق ءتىلىن ەنگىزۋ جانە قازاقشا كونتەنتتى بىرلەسە دامىتۋدى ۇسىندىم. كومپانيا وكىلى جەلىگە قازاق ءتىلىن ورناتۋ جايى قاراستىرىلىپ جاتقانىن جەتكىزدى. مينيسترلىك اقپارات، جاستار، وتباسى جانە ازاماتتىق قوعامدى دامىتۋ بويىنشا ۋاكىلەتتى ورگان بولعاندىقتان، كومپانيامەن كرەاتيۆتى كونتەنتتەر جانە زاماناۋي ساپالى ماتەريالدار جاساۋعا مۇددەلى. ماسەلەن، جەلىدە Bala house، «ەل بىرلىگى» جوبالارى جاقسى كورىلىپ جاتىر. بۇل باعىتتاعى جوبالاردى بىرگە جالعاستىرىپ، TikTok حاۋستاردى ۇيىمداستىرامىز. سەبەبى كومپانيا جەلىدە ءبىلىم بەرۋگە قاتىستى، يميدجدىك كونتەنتتەردى كوبەيتۋدى دە جوسپارلاپ وتىر ەكەن»،- دەپ جازدى مينيستر.
دارحان ءقىدىرالىنىڭ حابارلاۋىنشا، تەو بەرترامدى جۋىردا وتەتىن Astana Media Week اپتالىعىنا شاقىرعان. ال مارتەبەلى مەيمان اۋقىمدى ءىس-شاراعا قاتىسۋعا ىنتالى ەكەنىن بىلدىرگەن.
«تاعى ءبىر جاڭالىق، جۋىردا قازاقستاندا TikTok-تىڭ ءوفيسى اشىلادى. بۇل قازاقستاننىڭ بەلگىلى كومپانيامەن تىعىز بايلانىس ورناتىپ، ەلگە قاجەتتى دۇنيەلەردى اقىلداسا وتىرىپ جاساۋعا تاپتىرماس مۇمكىندىك دەپ ويلايمىن.استانادا وتكەن Digital Bridge فورۋمىندا مەملەكەت باسشىسى قازاقستاننىڭ الدىندا سيفرلىق ترانسفورماسيانىڭ باسىمدىقتارىن جاريالاعانى بەلگىلى. اتالعان كەزدەسۋلەر پرەزيدەنت قويعان مىندەتتەردى ساپالى ورىنداۋعا مۇمكىندىك بەرەدى دەپ سەنەمىن»، - دەپ جازدى مينيستر.