تاۋەلسىزدىكتىڭ 30 جىلدىق مەرەكەسى قارساڭىندا ەلىمىزدىڭ وركەندەۋىنە ۇلەس قوسقان تانىمال تۇلعالار مەن ەڭبەك ادامدارى مەملەكەت باسشىسىنىڭ جارلىعىمەن ماراپاتتارعا يە بولعان ەدى.
ماراپات يەلەرىنىڭ اراسىندا Almaty Aqshamy گازەتىنىڭ شىعارماشىلىق دامۋ جونىندەگى كەڭەس مۇشەسى، تاريح عىلىمىنىڭ دوكتورى، پروفەسسور، قازاقستان جۋرناليستيكا اكادەمياسىنىڭ پرەزيدەنتى ساعىمباي قوزىبايەۆ تا «قۇرمەت» وردەنىنە يە بولدى.
جۋرناليستيكانىڭ مايتالمانى قازاق ءبىلىمىنىڭ قارا شاڭىراعى ءال-فارابي اتىنداعى ۇلتتىق ۋنيۆەرسيتەتتە جارتى عاسىرعا جۋىق ابىرويمەن ەڭبەك ەتىپ، مىڭداعان شاكىرت دايىندادى. وسىناۋ ەڭبەك جولىندا قاتارداعى وقىتۋشىدان باستاپ، كافەدرا جەتەكشىسى، جۋرناليستيكا فاكۋلتەتى دەكانىنىڭ ورىنباسارى، فاكۋلتەت دەكانى سياقتى باسپالداقتارعا كوتەرىلدى.
بەلسەندى قوعام قايراتكەرى ساعىمباي قاباش ۇلى باسقارىپ وتىرعان قازاقستان جۋرناليستيكا اكادەمياسىنىڭ قۇرىلعانىنا 20 جىل تولسا، ونىڭ مۇشەلەرىنىڭ ءوزى مىڭداپ سانالادى. ەرەن ەڭبەك يەسى ساعىمباي قوزىبايەۆتىڭ شاكىرتتەرى تەك ءوز ەلىمىزدە ەمەس، كۋبا، ۆەتنام، لاوس، پاكىستان، سينگاپۋر، اۋعانستان سياقتى شەت مەملەكەتتەردە دە ابىرويمەن ەڭبەك ەتىپ ءجۇر.