الماتىلىقتارعا ءابىش كەكىلبايەۆتىڭ پوۆەسى نەگىزىندە تۇسىرىلگەن «شىڭىراۋ» ءفيلمى تانىستىرىلدى، دەپ حابارلايدى Almaty-aqshamy.kz.
الماتىدا «شىڭىراۋ» ءفيلمىنىڭ تۇساۋكەسەرى ءوتتى. كينوتۋىندىنىڭ سەناريىن رەجيسسەر جاڭابەك جەتىرۋوۆتىڭ ءوزى جازعانىن ايتا كەتۋ كەرەك. ءفيلمدى ق ر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن.
«فيلم 10-نان استام حالىقارالىق كينوفەستيۆالدىڭ كونكۋرستىق باعدارلاماسىنا قاتىسىپ باعاسىن العانمەن، ەلدەگى پرەمەراسى پاندەمياعا بايلانىستى كەيىنگە شەگەرىلگەن ەدى. سونىڭ رەتى بۇگىن كەلىپ وتىر»، - دەيدى جازۋشىنىڭ نەمەرەسى ابىل كەكىلبايەۆ.
ءابىش كەكىلبايەۆتىڭ «شىڭىراۋ» پوۆەسى جەلىسى بويىنشا تۇسىرىلگەن كارتينا قۇدىق قازۋشى ەڭسەپتىڭ وقيعاسىن بايانداي وتىرىپ، ادامعا ءتان مەنمەندىك، باقتالاستىق، ماحاببات، پەن دوستىق، قاستاندىق سىندى جاعىمسىز قاسيەتتەرىنىڭ پەردەسىن اشادى. نەگىزگى وي ءۇستىرت جازىعىندا قۇدىق قازۋدى كاسىپ ەتكەن ەكى قاراپايىم قۇدىقشىنىڭ اراسىنداعى باسەكە ارقىلى جەتكىزىلەدى.
ەلدىڭ باتاسىن الۋدى ماقسات تۇتىپ، بايىرعى كاسىپتى باسەكەنىڭ كوزىنە اينالدىرعان ەڭسەپ اقىرى سول باقتالاستىقتىڭ قۇربانىنا اينالادى.
«فيلم ادامنىڭ ءوز ماقساتىنا جەتۋ ءۇشىن ءومىر-باقي ەڭبەكتەنەتىنىن، ءبىراق ول ءوز مۇمكىندىگىنىڭ قاي جەردە سارقىلاتىنىن سەزبەي، شەكتەن اسىپ كەتىپ، ءوز ارمانىنىڭ قۇربانىنا اينالاتىنىن كورسەتەدى»، - دەيدى ابىل كەكىلبايەۆ.
ءفيلمنىڭ تۇسىرىلىمدەرى ماڭعىستاۋ وبلىسىندا ءوتۋى دە تەگىن ەمەس-تى. كارتينادا قاراقيا ويىسى، ءۇستىرت شوقىسى مەن كاسپيي تەڭىزى كورىنىس تابادى.
نەگىزى پوۆەست 1982 جىلى جارىق كورگەن. سودان بەرى 2009 جىلعا دەيىن بىرنەشە كينو مامانى ونى ەكرانعا شىعارۋعا نيەتتەنگەنىمەن، ءساتى تۇسپەگەن كورىنەدى.
«2009 جىلى «قازاقفيلم» كينوستۋدياسىنىڭ سول كەزدەگى پرەزيدەنتى ەرمەك امانشايەۆتىڭ ۇيىتقى بولۋىمەن ءابىش اتامنىڭ پوۆەسىن ەكرانعا شىعارۋ بويىنشا ناقتى جۇمىس باستالدى. بۇل جۇمىس جاڭابەك جەتىرۋوۆقا تاپسىرىلدى. ول كىسى پوۆەست اۆتورىمەن بىرنەشە رەت كەزدەسىپ، سەناريدىڭ العاشقى نۇسقاسىن وزىنە ماقۇلداتقان بولاتىن. وكىنىشكە قاراي، اتامىز ءفيلمدى ءتۇسىرۋ جۇمىستارى باستالعانىن كورمەي كەتتى. 2019 جىلى استانادا «ەۋرازيا» حالىقارالىق كينوفەستيۆالىنىڭ باعدارلاماسىندا «شىڭىراۋ» ءفيلمى العاش رەت كورسەتىلدى»، - دەيدى ءابىش كەكىلبايەۆتىڭ نەمەرەسى.
سول العاشقى كورسەتىلىمنەن باستاپ فيلم 10-نان استام حالىقارالىق فەستيۆالگە قاتىسىپ ۇلگەرگەن.
تۋىندىنىڭ اكتەرلىك قۇرامىنا كەلسەك، نەگىزگى رولدەردى قازاقستاننىڭ ەڭبەك سىڭىرگەن قايراتكەرى الدابەك شالبايەۆ، بەلگىلى تەاتر جانە كينو اكتەرى مۇحامەدجان مىرزاكەيەۆ، «دارىن» جاستار سىيلىعىنىڭ يەگەرى اسىلحان تولەپوۆ وينايدى.