جۇرگىزۋشى كۋالىگىن بەرۋ ءتارتىبى قيىندايدى

جاڭا جوبا بويىنشا، ەمتيحان سىنىبىنا كىرەتىن ازامات مەتالل دەتەكتوردان، اۋديو-بەينە فيكساسيادان جانە بيومەتريالىق سايكەستەندىرۋدەن وتەدى.

بۇل تۋرالى مالىمەت بەرگەن «ازاماتتارعا ارنالعان ۇكىمەت» مەملەكەتتىك كورپوراسياسى» كە اق باسقارما ءتوراعاسىنىڭ ءبىرىنشى ورىنباسارى سۇيەنىش ءابدىلدين اتاپ وتكەندەي، مامانداندىرىلعان حقكو-دا تانىمال قىزمەت ءتۇرى – جۇرگىزۋشى كۋالىكتەرىن بەرۋ، دەپ حابارلايدى اlmaty-akshamy.kz

«كەيبىر ازاماتتار تەوريالىق ەمتيحان تاپسىرۋدىڭ ءتۇرلى جولدارىن ىزدەيتىندەرى جاسىرىن ەمەس. مىسالى، ورنىنا بوگدە ادام ەمتيحان سىنىبىنا كىرگىزۋى، ءارتۇرلى گادجەتتەر مەن شپارگاركالاردىڭ باسقا تۇرلەرىن قولدانۋعا تىرىسادى»، - دەيدى ول.

«ازاماتتارعا ارنالعان ۇكىمەت» وكىلىنىڭ سوزىنشە، سىبايلاس جەمقورلىق تاۋەكەلدەرىن بولدىرماۋ ماقساتىندا وسى جىلدىڭ ءساۋىر ايىندا الماتىدا Ustudy-مەن بىرلەسىپ تەوريالىق ەمتيحان تاپسىرۋدىڭ پيلوتتىق جوباسى ىسكە قوسىلدى.

«بۇل پيلوتتىق جوبادا ەمتيحان سىنىبىنا كىرەتىن ازامات مەتالل دەتەكتوردان، اۋديو-بەينە فيكساسيادان جانە بيومەتريالىق سايكەستەندىرۋدەن وتەدى. پيلوتتىق جوبانى ەنگىزگەننەن كەيىن الماتىدا ەمتيحان تاپسىرۋعا ءوتىنىش ءبىلدىرۋ سانى كۇنىنە 6 ەسەگە، ياعني 532-دەن 88-گە دەيىن، ال ەمتيحانداردان وتكەندەردىڭ ۇلەسى 36،6%-دان 15،5%-عا دەيىن، ياعني 2 ەسەگە تومەندەگەنىن بايقاۋعا بولادى»، - دەپ ءتۇسىندىردى ءابدىلدين بريفينگتە.

بيىل ماۋسىم ايىنىڭ سوڭىندا بۇل جوبا نۇر-سۇلتان قالاسىندا دا ىسكە قوسىلدى. جىل سوڭىنا دەيىن بۇل جوبانى قازاقستان بويىنشا اۋقىمدى ەتۋ جوسپارلانىپ وتىر.