بيۋدجەتتىك مەكەمەلەر ءۇشىن وتىن جەتكىزۋ جۇمىستارى باستالدى.
الماتى وبلىسى جىلىتۋ ماۋسىمىنا دايىندالا باستادى، دەپ حابارلايدى Almaty-akshamy.kz.
وبلىستىق ەنەرگەتيكا جانە تۇكش باسقارماسىنىڭ مالىمەتىنشە، جىلىتۋ ماۋسىمىن ساپالى وتكىزۋ ءۇشىن 35 ورتالىق قازاندىق، 58،2 كم جىلۋ جەلىسى، 13،5 مىڭ كم ەلەكتر جەلىسى، 3101 بىرلىك ترانسفورماتورلىق قوسالقى ستانسا دايىندالۋدا.
«2021-2022 جىلعى جىلىتۋ ماۋسىمىنا دايىندىققا جانە ونى ۇزدىكسىز وتكىزۋ ءۇشىن الماتى وبلىسىندا بيۋدجەتتەن 13،7 ملرد. تەڭگە قاراستىرىلعان، سونىڭ 3،3 ملرد. تەڭگەسى جىلۋمەن قامتۋ نىساندارىن جوندەۋگە، 10،4 ملرد. تەڭگەسى وتىن ساتىپ الۋعا ءبولىندى»، – دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، بيۋدجەتتىك سالا نىساندارى ءۇشىن 26،2 ملن ليتر ديزەل وتىنىن ساتىپ الۋعا بيۋدجەتتەن 5،2 ملرد تەڭگە بولىنگەن. قازىرگى كەزدە بيۋدجەتتىك مەكەمەلەر ءۇشىن وتىن جەتكىزۋ جۇمىستارى باستالدى.
ەنەرگيا ءوندىرۋشى مەكەمەلەر ءۇشىن 405،3 مىڭ توننا كومىر، 15 مىڭ توننا مازۋت دايىنداۋ جوسپارلانعان. سول سياقتى حالىقتى كومىردىڭ قاجەتتى كولەمىمەن ۋاقتىلى قامتۋ جۇمىستارى جۇرگىزىلىپ جاتىر.
«بۇل رەتتە كومىردىڭ قاجەتتىلىگى - 1،37 ملن توننا. بۇگىنگى كۇنى تۇرعىندارعا 202،5 مىڭ توننا كومىر ساتىلدى، 94،1 مىڭ توننا كومىر قويمالاردا بار. جەرگىلىكتى اكىمدىك تۇرعىندارعا كومىردى ەرتە كەزدەن ساتىپ الۋ تۋرالى ۇگىت-ناسيحات جۇمىستارىن جۇرگىزۋدە. سونىمەن قاتار وبلىستا قازاندىقتاردى گازعا اۋىستىرۋ، بلوكتى-مودۋلدى قازاندىقتار ورناتۋ جۇمىستارى جۇيەلى تۇردە جالعاستىرىلۋدا»، – دەپ حابارلايدى الماتى وبلىسىنىڭ اكىمدىگى.