جۇرگىزۋشى كۋالىگىن الىپ بەرەمىن دەپ ازاماتتاردىڭ 8 ملن تەڭگەسىن جىمقىرعان ەكىباستۇز تۇرعىنى انىقتالدى.
الاياقتىق جاسادى دەگەن كۇدىكپەن ەكىباستۇز قالاسىنىڭ اۆتومەكتەپتەرىنىڭ بىرىندە ەسەپشى بولىپ بەيرەسمي جۇمىس ىستەگەن 33 جاستاعى تۇرعىن ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ول جۇرگىزۋشى كۋالىگىن الىپ بەرەمىن دەپ ازاماتتاردىڭ 8 ملن تەڭگەدەن استام قارجىسىن جىمقىرعان. جابىرلەنۋشىلەر قاتارىندا پاۆلودار وبلىسىنىڭ تۇرعىندارى مەن قوسا، اقمولا وبلىسىنىڭ تۇرعىندارى دا بار، – دەپ حابارلايدى Polisia.kz.
22 قازاندا ەر ادام پوليسياعا حابارلاسىپ، 2022 جىلدىڭ قازان ايىنان 2023 جىلدىڭ ماۋسىم ايىنىڭ ورتاسىنا دەيىن ايەل ەكىباستۇز قالاسىنىڭ اۆتومەكتەپتەرىنىڭ بىرىندە ەسەپشى بولىپ بەيرەسمي جۇمىس ىستەپ، مەملەكەتتىك مەكەمەلەردە تانىسىم بار، قاجەتتى ساناتتاعى جۇرگىزۋشى كۋالىكتەرىن الىپ بەرەمىن دەپ ۋادە بەرگەنىن انىقتادى. اۆتومەكتەپتىڭ وقۋشىلارى وعان 150 مىڭ تەڭگەدەن 400 مىڭ تەڭگەگە دەيىن (قاجەتتى ساناتقا بايلانىستى) اقشالاي قاراجاتتى جۇبايىنىڭ شوتىنا اۋدارىپ وتىرعان. كەيىن ەشقانداي ناتيجە بولماعاندىقتان، ازاماتتار پوليسياعا جۇگىندى. سونىمەن قاتار الاياقتىڭ تورىنا تەك پاۆلودار وبلىسىنىڭ تۇرعىندارى عانا ەمەس، كورشى اقمولا وبلىسىنىڭ تۇرعىندارى دا تۇسكەن. بۇگىنگى تاڭدا 48-گە جۋىق الدانعان ازامات انىقتالدى. تۇرعىندارعا 8 ملن تەڭگەدەن استام شىعىن كەلتىرىلگەن.
«وسى فاكتى بويىنشا قازاقستان رەسپۋبليكاسى قك-نىڭ 4-تارماعى 3-بولىگىنىڭ 190-بابى (الاياقتىق) بويىنشا سوتقا دەيىنگى تەرگەپ-تەكسەرۋ جۇرگىزىلەدى. الاياقتىق جاسادى دەپ كۇدىكتەنگەن ايەلگە قاتىستى كەلۋ تۋرالى مىندەتتەمە بۇلتارتپاۋ شاراسى تاڭدالدى»، – دەيدى پاۆلودار وبلىسى پوليسيا دەپارتامەنتىنىڭ باسپا ءسوز قىزمەتى.
قازاقستان رەسپۋبليكاسى كونستيتۋسياسىنىڭ 77-بابى 3-تارماعىنىڭ 1-تارماقشاسىنا، قازاقستان رەسپۋبليكاسى قىلمىستىق ءىس جۇرگىزۋ كودەكسىنىڭ 19-بابى 1-بولىگىنە سايكەس ادام ءوزىنىڭ كىناسى سوتتىڭ زاڭدى كۇشىنە ەنگەن ۇكىمىمەن تانىلعانعا دەيىن قىلمىس جاساعانى ءۇشىن كىناسىز دەپ ەسەپتەلەدى. پوليسيا دەپارتامەنتى جۇرگىزۋشى كۋالىگىن تەك ارنايى حقكو-دا ءتيىستى ەمتيحانداردى تاپسىرىپ، 1 اەك مولشەرىندە جۇرگىزۋشى كۋالىگى ءۇشىن مەملەكەتتىك باجدى تولەۋ قاجەت ەكەنىن ەسكە سالادى. 2019 جىلدىڭ 1 شىلدەسىنەن باستاپ جقە بويىنشا ەمتيحان تاپسىرۋ بويىنشا فۋنكسيالار مەملەكەتتىك كورپوراسياعا بەرىلدى.