بۇل تۋرالى "ازاماتتارعا ارنالعان ۇكىمەت" مەملەكەتتىك كورپوراسياسىنىڭ رەسمي سايتىندا حابارلاندى.
مامانداندىرىلعان حالىققا قىزمەت كورسەتۋ ورتالىعىندا وتكىزىلەتىن تەوريالىق جانە تاجىريبەلىك ەمتيحانعا ەندى تەك "حقكو" قوسىمشاسى ارقىلى عانا جازىلۋعا بولادى، دەپ حابارلايدى aqshamnews.kz
مەملەكەتتىك كورپوراسيا وكىلدەرى بۇل جاڭاشىلدىق ازاماتتارعا ىڭعايى بولۋ ءۇشىن جانە سىبايلاس جەمقورلىق تاۋەكەلدەرىن ازايتۋعا باعىتتالعانىن ايتادى. "قاۋىپسىزدىكتى قامتاماسىز ەتۋ ماقساتىندا "حقكو" قوسىمشاسىنىڭ بارلىق قولدانۋشىسى ەكى فاكتورلى اۋتەنتيفيكاسيادان وتەدى: الدىمەن – بيومەتريالىق يدەنتيفيكاسيا، سوسىن 1414 نومىرىنەن كەلىپ تۇسكەن SMS-كودى ارقىلى ءوزىنىڭ جەكە باسىن راستايدى. ودان كەيىن جۇرگىزۋشى كۋالىگىنە ۇمىتكەر "تەوريالىق ەمتيحانعا جازىلۋ" نەمەسە "تاجىريبەلىك ەمتيحانعا جازىلۋ" باتىرماسىن تاڭدايدى. بۇدان سوڭ قىزمەت الۋشىعا 1414 نومىرىنەن حابارلاما كەلىپ تۇسەدى.
ايتا كەتۋ كەرەك، SMS حابارلاما ءموبيلدى ازاماتتار بازاسىنا تىركەلگەن تەلەفون نومىرىنە جىبەرىلەدى. قوسىمشا ارقىلى ەمتيحانعا جازىلۋ ءۇشىن الدىن الا مامانداندىرىلعان حالىققا قىزمەت كورسەتۋ ورتالىعىنا جۇگىنىپ، ءوتىنىم ءنومىرىن الۋ قاجەت ەكەنىن ەسكەرتەمىز"، - دەلىنگەن حابارلامادا. بۇل سەرۆيس ەمتيحان ۋاقىتى مەن ەمتيحان تاپسىرۋ كەستەسىندەگى وزگەرىستەر تۋرالى پايدالانۋشىلارعا حابارلاپ وتىرادى. بۇل اقپاراتتى ىڭعايلى تۇردە جانە دەر كەزىندە الۋ مۇمكىندىگىن ەداۋىر ارتتىرادى.
ەسكە سالا كەتەيىك، ەمتيحانعا جازىلۋ بۇرىن booking.gov4c.kz سايتىندا جۇزەگە اسىرىلاتىن، الايدا "حقكو" ءموبيلدى قوسىمشاسى ارقىلى قىزمەتتى كەڭەيتىلگەن اۋقىمدا الۋ ءۇشىن سايتتاعى برونداۋ فۋنكسياسى وشىرىلەدى. دەسە دە سايت پايدالانۋشىلارعا ەمتيحان تاپسىرۋ ءساتىنىڭ ترانسلياسياسىن ونلاين رەجيمدە كورسەتۋ ءۇشىن ءوز جۇمىسىن جالعاستىرا بەرەدى. اتالعان قوسىمشا حقكو-عا بارۋ ۋاقىتىن برونداۋعا، ەلەكتروندى كەزەك ءۇشىن تالون الۋعا، قىزىقتىرعان حالىققا قىزمەت كورسەتۋ ورتالىعىنىڭ ورنالاسقان مەكەنجايىن تابۋ جانە وزەكتى سۇراقتارمەن تانىسۋعا مۇمكىندىك بەرەدى. "حقكو" قوسىمشاسىن Google Play جانە App Store ارقىلى جازىپ الۋعا بولادى.