قازاقستاننىڭ ەنەرگەتيكا مينيسترلىگى بەنزين مەن ديزەل وتىنىنىڭ شەكتى باعالارىن الىپ تاستاۋ مۇمكىندىگىن قاراستىرۋدا. بۇل شەشىم جانارماي باعاسىن نارىقتىق ۇلگىگە كوشىرۋ قاجەتتىلىگىمەن بايلانىستى. مينيسترلىكتىڭ پىكىرىنشە، مۇنداي قادام وتىن تاپشىلىعىن جويۋعا، سالانى جاڭعىرتۋعا جانە ۇزاق مەرزىمدى ينۆەستيسيالار تارتۋعا مۇمكىندىك بەرەدى.
بۇگىندە قازاقستاندا جانارماي باعاسى وڭىردەگى ەڭ تومەن دەڭگەيدە ساقتالىپ وتىر. مىسالى، اي-92 ماركالى بەنزيننىڭ ءبىر ءليترى قازاقستاندا 205 تەڭگە تۇرادى، ال رەسەيدە – 288 تەڭگە، قىرعىزستاندا – 385 تەڭگە، وزبەكستاندا – 489 تەڭگە. ديزەل وتىنىنىڭ قۇنى دا ايتارلىقتاي تومەن: قازاقستاندا ءبىر ءليترى 295 تەڭگە بولسا، كورشىلەس ەلدەردە 355-528 تەڭگەگە جەتەدى.
ەنەرگەتيكا مينيسترلىگىنىڭ مالىمدەۋىنشە، وسىنداي باعا ايىرماشىلىعى جانارمايدىڭ زاڭسىز جولمەن شەكارادان شىعارىلۋىنا جانە وتىن تاپشىلىعىنا اكەلىپ وتىر. سونىمەن قاتار بۇل مۇناي وڭدەۋ زاۋىتتارىن جاڭعىرتۋ ۇدەرىسىن تەجەيدى.
«قازاقستانداعى جانارماي باعاسى الەمدەگى ەڭ تومەندەردىڭ ءبىرى بولىپ قالا بەرەدى. بۇل كورشى ەلدەرمەن ارادا باعا ايىرماشىلىعىن تۋدىرىپ، وتىن تاپشىلىعىنا، سالانى جاڭعىرتۋداعى قيىندىقتارعا جانە جانارمايدى زاڭسىز ەكسپورتتاۋعا سەبەپ بولىپ وتىر»، – دەپ اتاپ ءوتتى مينيسترلىك وكىلدەرى.
ۇسىنىلىپ وتىرعان ساياسات سۇرانىس پەن ۇسىنىس اراسىنداعى نارىقتىق تەپە-تەڭدىكتى قامتاماسىز ەتۋگە، وتىن تاپشىلىعىن بولدىرماۋعا، جاڭا جۇمىس ورىندارىن اشۋعا جانە ۇزاق مەرزىمدى ينۆەستيسيالاردى تارتۋعا باعىتتالعان.
مينيسترلىك وزگەرىستەردى بىردەن ەمەس، كەزەڭ-كەزەڭىمەن ەنگىزۋدى، سونداي-اق الەۋمەتتىك قولداۋدى ەسكەرۋدى جوسپارلاپ وتىر. اتاپ ايتقاندا، اۋىل شارۋاشىلىعى وندىرۋشىلەرىنە ديزەل وتىنىنا جەڭىلدەتىلگەن جانە اشىق قولجەتىمدىلىكتى قامتاماسىز ەتۋ ۋادە ەتىلۋدە.
سونىمەن قاتار ازاماتتارعا قولداۋ كورسەتۋ شارالارى ساقتالادى دەپ مالىمدەلدى.