قاتتى سوققىدان جۇرەگىنە ماسساج جاسالعان
ماۋسىمنىڭ 3ء-ى كۇنى تاڭەرتەڭ الماتىدا جۇمابايەۆ پەن سەيفۋللين كوشەلەرىنىڭ قيىلىسىندا جول-كولىك وقيعاسى ورىن العان: جەڭىل كولىك مارشرۋتتىق اۆتوبۋسقا سوعىلدى. جەڭىل كولىك جۇرگىزۋشىسى دميتريي كولىك جۇرگىزىپ كەلە جاتىپ ەسىن جوعالتقان. قۇدايعا شۇكىر، اپاتتان زارداپ شەككەندەر جوق، دەپ حابارلايدى Almaty-akshamy.kz.
دارىگەرلەردىڭ ايتۋىنشا، ەر ادام جۇرەك تالماسىنا ۇشىراپ، اۆتوبۋس سوققىسى ءدميترييدىڭ ءومىرىن ساقتاپ قالدى: ول كەۋدەسىمەن رۋلگە قاتتى سوعىلىپ، جۇرەككە مەحانيكالىق ماسساج جاسالعان ەكەن.
«سول كۇنى ءوزىمدى ناشار سەزىنىپ، تەرلەپ وياندىم، بۇكىل بويىمدا السىزدىك بولدى، ءبىراق مەن بۇعان ءمان بەرمەدىم. ەكى ستاكان قويۋ كوفە ءىشتىم، سودان كەيىن قۇستىم، بۇعان دا اسا ءمان بەرمەدىم. ماشيناعا وتىرىپ، ءجۇرىپ كەتتىم. ەسىمنەن تانىپ قالدىم، ءسويتىپ جان ساقتاۋ بولىمىندە ءبىراق وياندىم. ەسىمدە تۇك جوق. اۆتوبۋسقا سوعىلعانىمدى، مەنى قۇتقارعاندارىن ماعان ايتىپ بەردى. سودان ءبىلدىم. سوققى جۇرەككە مەحانيكالىق ماسساج جاساپ، جۇرەك قايتا جۇرگەن ەكەن. مەن اۆتوبۋسقا كىرىپ كەتىپ، ارتقى تەرەزە سىندىرعان ەكەنمىن. اۆتوبۋس جۇرگىزۋشىسى جەدەل جاردەم شاقىرىپ، مەنى كولىگىمنەن شىعارىپ، سۋ شاشىپ، العاشقى مەديسينالىق كومەك كورسەتتى. مەن اۆتوبۋس جۇرگىزۋشىسىن تاۋىپ، وعان كورسەتكەن كومەگى ءۇشىن العىس بىلدىرگىم كەلەدى. ءتورتىنشى قالالىق اۋرۋحانادا جۇرەك تامىرلارىنا وتا جاسالدى، ترومبتى الىپ تاستادى، ءقازىر ءوزىمدى ايتارلىقتاي جاقسى سەزىنەمىن، بۇرىن قىسىمىم 100/90 بولسا، ءقازىر 110/80 بولدى»، - دەيدى الماتى قالاسىنىڭ تۇرعىنى دميتريي سينياكين.
- بولعان وقيعا – بىرەگەي، - دەيدى №4 قالالىق كلينيكالىق اۋرۋحانانىڭ رەنتگەن-ەندوۆاسكۋليارلىق حيرۋرگيا جانە كارديولوگيا بولىمشەسىنىڭ مەڭگەرۋشىسى اسقار نارىنبايەۆ. ونىڭ بولىمشەسى جۇرەك پەن ميدىڭ ومىرلىك ماڭىزدى تامىرلارىنداعى قان اينالىمىن قالپىنا كەلتىرۋ بويىنشا ماڭىزدى حيرۋرگيالىق وتالاردى جاسايدى.
«ناۋقاس بىزگە شۇعىل تۇردە كارديوگەندى شوك جانە تومەن قان قىسىمى كلينيكاسىمەن وتە اۋىر جاعدايدا ءتۇستى. ناۋقاستى قابىلداۋ بولىمىنە كىرگىزبەي، بىردەن رەنتگەن-ەندوۆاسكۋليارلىق حيرۋرگيانىڭ وتا جاساۋ بولىمىنە جەتكىزدى. «وڭ جاق كورونارلىق ارتەريانىڭ جەدەل ترومبوزىن» انىقتادىق. ارتەريا ترومبوزدىق ماسسالارمەن جابىلدى، ءبىز انگيوپلاستيكا، ترومب اسپيراسياسىن جاساپ، قان اعىمىن قالپىنا كەلتىردىك، سودان كەيىن ستەنت قويدىق. ناۋقاستا كورونارلىق قان اعىمى تولىق قالپىنا كەلدى. بۇل جايت كورونارلىق ارتەريالاردىڭ جەدەل ترومبوزى كەزىندە ومىرگە ءقاۋىپ توندىرەتىن اريتميانىڭ پايدا بولۋىمەن، ول ەلەكترلىك كارديوۆەرسيا نەمەسە ەلەكترلىك كارديودەفيبريللياسيا ارقىلى قالپىنا كەلتىرىلەتىنىمەن قىزىق. بۇل جەردە اۆتوبۋسپەن جەڭىل كولىك سوقتىعىسىپ، ەر ادام كەۋدە تۇسىنان سوققى العان. ءارى بۇل سوققى جۇرەك ىرعاعىنىڭ قالپىنا كەلۋىنە اسەر ەتكەن - بۇل مەحانيكالىق كارديوۆەرسيا دەپ اتالادى. بۇل باقىتقا باستايتىن باقىتسىزدىق بولدى عوي»، - دەپ ءتۇسىندىردى №4 قالالىق كلينيكالىق اۋرۋحانانىڭ بولىمشە مەڭگەرۋشىسى اسقار نارىنبايەۆ.
دارىگەرلەر ماڭىزدى نارسەنى ەستە ساقتاۋدى ۇسىنادى: ەگەر كلينيكالىق بەلگىلەر پايدا بولسا، دەرەۋ دارىگەرمەن كەڭەسىپ، اسقىنۋلاردىڭ الدىن العان دۇرىس.
«جەدەل ميوكارد ينفاركتىسى بار ناۋقاس ەمحاناعا نەعۇرلىم تەزىرەك جەتكىزىلسە، دارىگەردىڭ كورونارلىق قان اعىمىن قالپىنا كەلتىرۋ جانە نەكروز ايماعىن ازايتۋ ءۇشىن جىلدام مانيپۋلياسيا جاساۋ مۇمكىندىگى سوعۇرلىم جوعارى بولادى، بۇل ونىڭ ودان ءارى ءومىر ءسۇرۋ ساپاسىنا اسەر ەتەدى»، – دەپ قورىتىندىلادى دارىگەر.
دميتريي سينياكيننىڭ وقيعاسى باقىتتى اياقتالدى. الماتىلىق ازامات ساتپاقشى بولعان كولىك يەسىندە قالدى. يەسىنىڭ ءومىرىن ساقتاپ قالعان كولىك سينياكيندەر وتباسىنىڭ بويتۇمارىنا اينالماقشى.
