اتىراۋدا ناۋقاستىڭ ولىمىنە كىنالى دارىگەرلەرگە سوت ۇكىمى شىقتى

سوتتالعانداردان جابىرلەنۋشىلەردىڭ پايداسىنا 8 ملن تەڭگە مورالدىق زالال وتەماقىسى ءوندىرىلدى

اتىراۋدا كاسىبي مىندەتتەرىن دۇرىس ورىنداماعان دارىگەرلەرگە قاتىستى سوت ۇكىمى شىقتى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ. 

قۇرمانعازى اۋداندىق ستاسيوناردىڭ ينفەكسيونيست دارىگەرى مەن انەستەزيولوگ-رەانيماتولوگى 2020 جىلدىڭ اياعىندا «پنيەۆمونيا» جانە قانت ديابەتى دياگنوزىمەن اۋرۋحاناعا تۇسكەن ناۋقاسقا ءتيىستى مەديسينالىق كومەك كورسەتپەگەن. اق حالاتتىلاردىڭ كاسىپتىك مىندەتتەرىنە ۇقىپسىز قاراۋى سالدارىنان ناۋقاس قايتىس بولىپتى. كۇدىكتىلەردىڭ كىناسى جابىرلەنۋشىلەردىڭ، كۋالاردىڭ، ساراپشىلاردىڭ ايعاقتارىمەن جانە كوميسسيالىق سوت-مەديسينالىق ساراپتامانىڭ قورىتىندىسىمەن دالەلدەنگەن. سوت ۇكىمى بويىنشا دارىگەرلەرگە 2،5 جىل مەرزىمگە باس بوستاندىعىنان ايىرۋ جازاسى تاعايىندالعان. ءبىراق راقىمشىلىق جاساۋ زاڭىنا سايكەس ولار تەمىر تورعا قامالمايدى. سوتتالعانداردان جابىرلەنۋشىلەردىڭ پايداسىنا 8 ملن تەڭگە مورالدىق زالال وتەماقىسى ءوندىرىلدى.

«سوتتالۋشىلارعا دارىگەرلىك قىزمەتپەن اينالىسۋ قۇقىعىنان ايىرۋ جازاسىن تاعايىنداي وتىرىپ، باس بوستاندىعىنان ايىرۋ جازاسى تاعايىندالدى. الايدا ق ر تاۋەلسىزدىگىنىڭ 30 جىلدىعىنا بايلانىستى راقىمشىلدىق جاساۋ جونىندەگى زاڭنىڭ نەگىزىندە ولار باس بوستاندىعىنان ايىرۋ جازاسىنان بوساتىلدى»،-دەدى قۇرمانعازى اۋداندىق سوتىنىڭ سۋدياسى بەيبىتگۇل مەڭسەيىتوۆا.