قمدب ءپاتۋاسى بويىنشا، اۋىر جۇمىس ىستەيتىندەر ورازاسىن اياعىنا دەيىن ۇستاۋعا كەدەرگى كەلتىرەتىندەي تىم كوپ جۇمىس ىستەمەۋى كەرەك.
اۋىر جۇمىس ىستەيتىن اۋزى بەرىك ادام قاتتى ءشول مەن اشتىققا شالدىعىپ، سول ءۇشىن ومىرىنەن نە ەسىنەن ايىرىلاتىنداي جاعدايعا دۋشار بولسا، وندا وعان ورازاسىن بۇزۋعا رۇقسات ەتىلەدى، كەيىننەن بۇل كۇننىڭ قازاسىن عانا وتەيدى، – دەپ حابارلايدى aqshamnews.kz قمدب-عا سىلتەمە جاساپ.
تەك ءوزىن السىرەتۋگە ءوزى سەبەپشى بولىپ، ءتىپتى اۋىز اشۋعا دەيىن الىپ بارسا، ءارى بۇعان ەشقانداي زارۋلىك جاعداي تۇرتكى بولماسا عانا كاففاراتىن وتەيدى.
سوندىقتان ناۋبايشى، ەگىنشى سەكىلدى اۋىر جۇمىس ىستەيتىندەر ورازاسىن اياعىنا دەيىن ۇستاۋعا كەدەرگى كەلتىرەتىندەي تىم كوپ جۇمىس ىستەمەۋى كەرەك. رامازان كۇندەرىندە كۇندىزگى جۇمىسىن قىسقارتۋى نەمەسە تۇنگى ۋاقىتقا اۋىستىرۋى قاجەت. دەگەنمەن رامازان ايلارىندا اۋىر جۇمىس ىستەۋگە ءماجبۇر بولعان ادامدار تاڭ اتقاننان اۋزىن اشا بەرمەيدى. سارەسىن ءىشىپ، اۋزىن بەكىتەدى. مۇمكىن اللا وعان ورازاسىن سوڭىنا دەيىن تۇتۋعا كومەك بەرەر.
«ءوزىنىڭ جۇمىسىن ىستەۋ ارقىلى اۋىز اشۋعا رۇقسات ەتەتىن زياننىڭ جەتۋىن ءبىلىپ، الايدا اۋىرماي، نە قينالماي جاتىپ ورازاسىن بۇزۋى – حارام»، – دەلىنگەن "ءال-فاتاۋا ءال-ھينديا" اتتى كىتاپتا.
سوندىقتان اۋىر جۇمىس ىستەيتىن ادام سەبەپسىز ورازا ۇستاماي قالماۋىنا بولمايدى. ونداي ادام رامازان ايىنىڭ مول ساۋابىنان قۇر قالىپ قويماۋى ءۇشىن ەڭبەك دەمالىسىن وسى ايعا سايكەستەندىرىپ، مۇمكىندىگىنشە جۇمىس ۋاقىتىن قىسقارتىپ نەمەسە ودان جەڭىلدەۋ جۇمىسقا اۋىسقانى ابزال.