اعىمداعى جىلدىڭ 10 شىلدەسى كۇنى جامبىل وبلىسى، گۆاردەيسكيي وقۋ ورتالىعىندا الماتى قالاسى جاستار ساياساتى باسقارماسىنىڭ جانە ق ر قورعانىس مينيسترلىگىنىڭ قولداۋىمەن «الماتى» ستۋدەنتتەر اليانسى» كورپوراتيۆتىك قورىنىڭ ۇيىمداستىرۋمەن «Jiger» جاستاردى اسكەري-پاتريوتتىق تاربيەلەۋ بويىنشا ءىس-شارالار كەشەنىن وتكىزۋ» جوباسى اياسىندا اسكەري-دالالىق لاگەردىڭ سالتاناتتى جابىلۋ ءراسىمى ءوتتى.
بۇل جوبا تۇڭعىش رەت پيلوتتىق جوبا رەتىندە الماتى قالاسى جانە جەتىسۋ وبلىستارىندا جۇزەگە اسىرىلدى.
اسكەري-دالالىق لاگەرگە 18-دەن 24 جاسقا دەيىنگى الماتى قالاسىنىڭ جۇمىسپەن قامتىلماعان 30 جاسى قاتىستى. لاگەر 17 كۇنگە سوزىلدى. اسكەري-دالالىق لاگەردە اسكەري وقۋ-جاتتىعۋ جۇمىستارى، جاستاردىڭ دالالىق ماشىقتارىن پىسىقتاۋ، جەكە قۇرامعا جاڭا تەحنيكالاردى تانىستىرۋ، وقۋ-جاتتىعۋ بارىسىندا جاۋىنگەرلىك تەحنيكامەن قارۋ جاراقتىڭ تۇرلەرىمەن تانىسۋ، اسكەر بولىمدەرىن جانە اسكەر ءتۇرىن سوعىس تارتىبىنە كەلتىرىپ، جاستاردىڭ تاكتيكالىق ءبىلىمىن جەتىلدىرۋ جانە ت.ب. جۇمىستارى جۇرگىزىلدى.
اسكەري-دالالىق لاگەردىڭ جابىلۋ سالتاناتىنا ق ر قورعانىس مينيسترلىگى مەن ق ر قارۋلى كۇشتەرىنىڭ وكىلدەرى، جاستار ساياساتى باسقارماسىنىڭ وكىلدەرى قاتىستى .
جاستار ساياساتى باسقارماسىنىڭ ءبولىم باسشىسى نۇرسۇلتان بولات ۇلى اسكەري-دالالىق لاگەردىڭ جوعارى دەڭگەيدە وتكەندىگىن اتاپ ءوتىپ، وفيسەرلىك قۇرامعا جانە كۋرسانتتارعا وسى لاگەردى جوعارى دەڭگەيدە ۇيىمداستىرعانى ءۇشىن ۇلكەن العىس ءبىلدىردى. الماتى قالاسى جاستار ساياساتى باسقارماسى كەز-كەلگەن باستامانى، سونىڭ ىشىندە جۇمىسسىز جاستاردى جۇمىسقا ورنالاستىرۋ، ولاردىڭ بوس ۋاقىتتارىن ءتيىمدى پايدالانۋ ءۇشىن، وسىنداي جوبالاردى ءارقاشان قولداۋعا، ۇيىمداستىرۋعا دايىن ەكەندىگىن جەتكىزدى.
وسى لاگەردى ۇيىمداستىرعان الماتى ستۋدەنتتەر اليانسىنا ەرەكشە ىقىلاسىن ءبىلدىرىپ، بولاشاقتا جوبانىڭ جالعاسىن تاباتىندىعىن ايتتى!
الماتى ستۋدەنتتەر اليانسى كق اتقارۋشى ديرەكتورى جاسۇلان بوستاندىق ۇلى جينالعانداردى 17 كۇندىك لاگەردىڭ اياقتالعانىمەن قۇتتىقتاپ، ءوزىنىڭ ىزگى تىلەگىن ءبىلدىردى:
«قۇرمەتتى قاتىسۋشىلار، ەكى اپتانى وتە جوعارى دەڭگەيدە وتكىزگەندەرىڭىزدى كورۋگە بولادى. وسى العان داعدىلارىڭىزدى ۇمىتپاي، ءارقاشاندا جەتىلدىرىپ جۇرىڭىزدەر. «JIGER» اسكەري-پاتريوتتىق لاگەرى ءبىرىنشى رەت وتكىزىلىپ وتىر. جالپى اسكەري-پاتريوتتىق باعىتتاعى جوبالاردى الماتى ستۋدەنتتەر اليانسى 4 جىل قاتارىنان وتكىزىپ كەلە جاتىر. جاس سارباز قوزعالىسىمەن بىرگە وقۋشىلار، ستۋدەنتتەر اراسىندا وتكىزەتىن ەدىك، بيىل العاش رەت جاستار ساياساتىنىڭ قولداۋىمەن اسكەري بازانىڭ توڭىرەگىندە جۇمىسسىز جاستارمەن وتكىزىپ وتىرمىز».
لاگەر قاتىسۋشىلارى وزدەرىنىڭ پىكىرلەرىمەن ءبولىسىپ، اسكەري ومىرگە دەگەن كوزقاراستارىنىڭ وزگەرگەندىگى تۋرالى، لاگەر بارىسىنداعى قىزىقتى ساتتەرى تۋرالى پىكىر ءبىلدىرىپ، وي ءبولىستى.
اسكەري-دالالىق لاگەر قاتىسۋشىسى يسماگۋلوۆ ابزال قۋانىش ۇلىنىڭ پىكىرىنشە گۆاردەيسكيي گارنيزونى 30212 اسكەري بولىمىندە وتكەن «Jiger» اسكەري-دالالىق لاگەرىندە اسكەري تارتىپكە ۇيرەنىپ قانا قويماي، قارۋ-جاراق پەن اسكەري تەحنيكا تۇرلەرىمەن تانىسقان، ودان بولەك جوسپار بويىنشا وتكەن ساباقتاردىڭ ەرەكشە اسەر ەتكەنىن جەتكىزدى. جەتىسۋ وبلىسى مەن الماتى قالاسى جاستارى اراسىندا كوپتەگەن جارىستار بولىپ، سول جارىستاردىڭ ناتيجەسىندە جەتىستىككە جەتكەن كۋرسانتتار ماراپاتتار العان. بولاشاق ساربازدارعا «وتان قورعاۋ قازاقستان رەسپۋبليكاسىنىڭ ءار ەر ازاماتىنىڭ پارىزى، سوندىقتان بارشاڭىزدى وتان الدىنداعى بورىشتارىڭىزدى وتەۋگە شاقىرامىن»-دەدى.
سونىمەن قاتار، لاگەر قاتىسۋشىلارى جانە قورعانىس مينسترلىگىنىڭ وكىلدەرى جاستار ساياساتانىڭ اتىنان ارنايى العىس حاتپەن ماراپاتتالدى!