پرەزيدەنتتىڭ باستاماسىمەن قولعا الىنعان جۇمىسشى ماماندىقتار جىلى ەڭبەك نارىعىندا الماتىداعى كوللەدجدىڭ تۇلەكتەرىنە سۇرانىس ارتىپتى.
بۇعان مىسال، تۋريزم جانە قوناقجايلىلىق يندۋسترياسى كوللەدجى (تجقيك). ول بيزنەسپەن ىنتىماقتاسىپ، تاجىريبەمەن ۇشتاسقان وقۋ ءادىسىن ساتىمەن جۇزەگە اسىرىپ كەلەدى. وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى بارىسىندا كوللەدج ديرەكتورى وسىلاي دەپ مالىمدەدى.
جۇمىسشى ماماندىقتار جىلىندا تەحنيكالىق جانە كاسىپتىك ءبىلىم بەرەتىن ۇيىمداردا باسەكەگە قابىلەتتى كادرلار دايارلاۋ مەن ولاردى جۇمىسقا ورنالاستىرۋعا ەرەكشە كوڭىل بولىنگەن. تۋريزم جانە قوناقجايلىلىق يندۋسترياسى كوللەدجى وسى باعىتتا جۇمىس بەرۋشىلەرمەن الەۋمەتتىك سەرىكتەستىكتى ءتيىمدى قولدانا وتىرىپ، وقۋ بىتىرگەن تۇلەكتەرىن كاسىبي ورتاعا ساتىمەن بەيىمدەي الاتىن وقۋ ورنى رەتىندە كوزگە تۇسكەن.
كوللەدج كوپ جىل بويى قوناق ءۇي مەن مەيرامحانا بيزنەسىنە كادر دايارلاپ كەلە جاتقان تەحنيكالىق جانە كاسىپتىك ءبىلىم بەرەتىن قازاقستانداعى جەتەكشى مەكەمە سانالادى. سالالىق كاسىپورىندارمەن تىعىز بايلانىس ورناتا وتىرىپ، كوللەدج وقۋ ساپاسىن جوعارى دەڭگەيدە ۇستاپ تۇرۋمەن قاتار، ستۋدەنتتەرىنە قىزمەتتە وسىپ-ونەتىن مۇمكىندىك ۇسىنا الادى. بۇگىندە كوللەدج تۇلەكتەرىنىڭ جۇمىسقا ورنالاسۋ كورسەتكىشى 83%-عا جەتىپتى. ولار جۇمىس بەرۋشىلەرمەن قويان-قولتىق جۇمىس ىستەگەندىكتەن وسىنداي ناتيجەگە قول جەتكىزگەن.
«ءبىز جۇمىس بەرۋشىمەن كەلىسىپ، الەۋمەتتىك سەرىكتەستەرمەن تىعىز بايلانىس ورناتتىق. سودان ستۋدەنتتەرىمىز جۇمىس تاۋىپ كەتىپ جاتىر. جۇمىس بەرۋشىلەردىڭ قاۋىمداستىقتارىمەن جانە باسقا دا ۇيىمدارمەن بىرلەسە وتىرىپ، ستۋدەنتتەرگە پراكتيكا مەن تاعىلىمدامادان ءوتۋ مۇمكىندىگىن ۇسىنامىز. بيىل كوللەدجدى 460 ستۋدەنت ءبىتىردى، سونىڭ 83%-ى ءوز ماماندىعى بويىنشا جۇمىسقا ورنالاستى. قالعانى وقۋىن جالعاستىرىپ جاتىر، اسكەري قىزمەتتە نەمەسە دەكرەتتىك دەمالىستا ءقازىر. بۇل بىرلەسىپ ىستەگەن وسىنداي ۇلكەن جۇمىستىڭ ارقاسى»، – دەدى كوللەدج ديرەكتورى نۇرداۋلەت جابىقبايەۆ.
تجقيك الماتى قالاسىنداعى 280 كاسىپورىنمەن – قوناق ۇيلەر، مەيرامحانالار، تۋريستىك كومپانيالارمەن ىنتىماقتاستىق تۋرالى كەلىسىمشارتقا وتىرعان. وسىنىڭ ارقاسىندا ستۋدەنتتەر تاجىريبەدەن ءوتىپ، ديپلوم العانشا كاسىبي ورتاعا بەيىمدەلىپ ۇلگەرەدى. سونىمەن قاتار، جۇمىس بەرۋشىلەر كوللەدجگە ەڭبەك نارىعىنداعى سۇرانىستار جونىندە ۇنەمى اقپارات بەرىپ وتىرادى، بۇل وقۋ باعدارلاماسىن دەر كەزىندە بەيىمدەپ، ستۋدەنتتەردىڭ زامان تالابىنا ساي ماشىقتانىپ شىعۋىنا مۇمكىندىك بەرەدى.
كوللەدجدىڭ بوس جۇمىس ورىندارىنىڭ جارمەڭكەسى مەن جۇمىس بەرۋشىلەرمەن ۇيىمداستىراتىن كەزدەسۋدىڭ دە تۇلەكتەردى جۇمىسقا ورنالاستىرۋعا كوپ سەپتىگى تيگەن. بۇل ستۋدەنتتەرگە وقۋ بارىسىندا بولاشاق جۇمىس بەرۋشىمەن جاقىن تانىسۋعا جول اشادى. وسى مودەلدىڭ ارقاسىندا تجقيك تۇلەكتەرى جۇمىسقا ورنالاسىپ قانا قويماي، ءوز ماماندىعى بويىنشا جۇمىس ىستەپ، جاڭا ۇجىمعا تەز بەيىمدەلىپ، كاسىبي تۇرعىدا دامۋ جولىن باستاپ كەتىپ جاتىر.
«ءبىزدىڭ تۇلەكتەرىمىز ماماندىق بويىنشا جۇمىسقا ورنالاسىپ، قوعامدىق تاماقتانۋ ورىندارىندا اسپاز، كونديتەر نەمەسە ءتىپتى ءقوناقۇي شارۋاشىلىعىنىڭ باسشىسى دەڭگەيىنە دەيىن ءوسىپ كەلەدى. بىزدە تۇلەكتەردىڭ ءوسۋى مەن جۇمىسقا ورنالاسۋىن قامتاماسىز ەتەتىن ارناۋلى ورتالىق جۇمىس ىستەيدى. بۇل ورتالىق تۇلەكتەردىڭ وندىرىستە جۇمىسقا ورنالاسۋ كورسەتكىشىن بارىنشا ارتتىرۋعا تىرىسادى. مۇندا ءتۇرلى شەبەرلىك ساباقتارى، قوناق دارىستەرى وتكىزىلەدى. ءبىز جۇمىس بەرۋشىلەردى شاقىرىپ، تۇلەكتەرگە جۇمىسقا ورنالاسۋ جولدارىن تۇسىندىرەمىز، جارمەڭكەلەر ۇيىمداستىرامىز»، – دەيدى كوللەدجدىڭ وقۋ-وندىرىستىك جۇمىس جونىندەگى ورىنباسارى گۇلىم ومىربەكوۆا.
كوللەدج ءقازىر ءوز سالاسى بويىنشا قازاقستانداعى ەڭ ۇزدىك كوللەدجدەردىڭ قاتارىندا ەكەنىن سەنىمدى تۇردە دالەلدەپ وتىر. كوللەدج باسشىلىعى مۇنداي ناتيجەگە الەۋمەتتىك سەرىكتەستىك پەن كاسىبي ماماندار دايارلاۋعا باعىتتالعان تۇراقتى جۇمىستىڭ ارقاسىندا قول جەتكىزگەنىن ايتادى.
«مەن تاماقتانۋدى ۇيىمداستىرۋ ماماندىعى بويىنشا ءبىلىم الدىم، “اسپاز-تەحنولوگ” بىلىكتىلىگىن يەلەندىم. بيىل كوللەدجدى ءتامامدادىم. وقۋ باعدارلاماسى وتە ۇنادى. دۋالدى وقىتۋ بويىنشا وقىدىم، ءبىر اپتا پراكتيكا، ءبىر اپتا تەوريا وندا. بۇل وتە ۇلكەن ارتىقشىلىق، سەبەبى پراكتيكالىق ساباقتار اسا ماڭىزدى ءرول اتقارادى. سەن جۇمىستىڭ بارىسىندا ۇيرەنەسىڭ. ءوندىرىستىڭ ىشكى قۇرىلىمىمەن تانىسىپ، ارىپتەستەرمەن قارىم-قاتىناس ورناتىپ، ولاردىڭ تاجىريبەسىن مەڭگەرەسىڭ. مەنى شەف-اسپاز تاراس كورچاگين قابىلداپ، كوپ نارسە ۇيرەتتى. ول دا وسى كوللەدجدى بىتىرگەن. كوللەدجدەن كەيىن وسى جەرگە اسپاز بولىپ جۇمىسقا تۇردىم، ءقازىر شەف دەڭگەيىنە دەيىن كوتەرىلدىم»، – دەيدى كوللەدج تۇلەگى يبراگيم ءابدۋراحيموۆ.
ءبىلىم بەرۋ مەن بيزنەستىڭ ءوزارا ءتيىمدى سەرىكتەستىگى ناقتى ءارى تۇراقتى ناتيجەلەرگە قول جەتكىزۋگە مۇمكىندىك بەرەدى.
كوللەدج تۇلەكتەرى – ەل ەكونوميكاسىنىڭ ماڭىزدى بولىگىنە اينالىپ، ءوز ماماندىعى بويىنشا جۇمىس تاۋىپ، سالا-سالانىڭ دامۋىنا ۇلەس قوسىپ جاتىر. تۋريزم جانە قوناقجايلىلىق يندۋسترياسى كوللەدجى – ءبىلىم بەرۋ جۇيەسىنىڭ ءتيىمدى جانە ناتيجەلى بولا الاتىنىن دالەلدەگەن وقۋ ورنىنىڭ ءبىرى بولىپ وتىر.