قحر-نا جۇمىس ساپارى اياسىندا الماتى اكىمى ەربولات دوسايەۆ بۇلتتى ەسەپتەۋلەر، ۇلكەن دەرەكتەر جانە ينتەللەكتۋالدى شەشىمدەر ازىرلەۋدە جەتەكشى قىتايلىق Inspur Group كومپانياسىنىڭ باسشىلىعىمەن كەزدەستى. كەلىسسوز بارىسىندا تاراپتار قالالىق ينفراقۇرىلىمدى سيفرلاندىرۋ، وزىق ىت-شەشىمدەردى ەنگىزۋ جانە كولىك جۇيەسىن ينتەللەكتۋالدى باسقارۋ سالاسىنداعى ىنتىماقتاستىق مۇمكىندىكتەرىن قاراستىردى، دەپ حابارلايدى aqshamnews.kz
سەرىكتەستىك اياسىندا Inspur Group الماتىدا ءبىرقاتار باستامانى جۇزەگە اسىرۋدى جوسپارلاپ وتىر. اتاپ ايتقاندا، كولىكتى باسقارۋ بويىنشا كوماندالىق ورتالىق قۇرۋ، سەرۆەرلىك جابدىقتار مەن سيفرلىق شەشىمدەردى جەتكىزۋ، الماتىدا زياتكەرلىك كولىك جۇيەسىن (ITS) ەنگىزۋ – بۇل قالاداعى جول قوزعالىسىن ۇيلەستىرۋ تيىمدىلىگىن ارتتىرۋعا باعىتتالعان. بۇعان قوسا، كومپانيا الماتىدا كولىك تەحنولوگيالارىن دامىتۋ، توتەنشە جاعدايلارعا ارەكەت ەتۋ، سۋ رەسۋرستارىن قورعاۋ، دەنساۋلىق ساقتاۋ جانە زياتكەرلىك تەرمينالدار سالاسىنداعى شەشىمدەردى ازىرلەۋ جونىندەگى عىلىمي-زەرتتەۋ ورتالىعىن اشۋ مۇمكىندىگىن قاراستىرۋدا.
كەزدەسۋ سوڭىندا تاراپتار قالالىق قىزمەتتەردىڭ ساپاسىن ارتتىرۋ جانە الماتىداعى كولىك لەگىن باسقارۋدى جاقسارتۋ ماقساتىندا ىنتىماقتاستىق پەن سەرىكتەستىكتى ودان ءارى دامىتۋ جونىندە كەلىسىمگە كەلدى.
انىقتاما:
Inspur Group – سەرۆەرلىك جابدىقتار، بۇلتتى پلاتفورمالار جانە باعدارلامالىق شەشىمدەر جەتكىزەتىن الەمدەگى ءىرى كومپانيالاردىڭ ءبىرى. ول قىتايدىڭ ىشكى نارىعىنىڭ 40%-ىن قامتيدى جانە 120-دان استام ەلدە «اقىلدى قالالار»، قوزعالىستى باسقارۋ، سالىقتىق باقىلاۋ جانە سيفرلىق ءبىلىم بەرۋ تەحنولوگيالارىن ازىرلەۋگە قاتىسادى. بۇگىندە Inspur جابدىقتارىن جەتكىزەتىن ەكى كومپانيا قازاقستاندا جۇمىس ىستەيدى. ورتالىق ازيا ايماعىندا زەرتتەۋ جۇمىستارىن جۇرگىزۋگە ارنالعان سەرۆيستىك ورتالىق اشۋ جوسپارلانۋدا. سونداي-اق، LED/LCD ديسپلەيلەر، زاريادتاۋ بەكەتتەرى جانە باسقا دا تەحنولوگيالىق شەشىمدەر شىعاراتىن زاۋىت سالۋ ءۇشىن جەرگىلىكتى سەرىكتەستەرمەن بىرلەسىپ جۇمىس ىستەۋ كوزدەلىپ وتىر.