جۇمىسشى ماماندىقتارى – ەل ەكونوميكاسىنىڭ نەگىزى. قازاقستاننىڭ دامۋى مەن وركەندەۋى تىكەلەي كاسىبي ماماندارعا بايلانىستى. 2025 جىلدىڭ جۇمىسشى ماماندىقتار جىلى دەپ جاريالانۋى – بۇل ەڭبەك ادامدارىنا، تەحنيكالىق جانە كاسىپتىك ءبىلىم بەرۋ جۇيەسىنە كورسەتىلگەن زور قولداۋ. قازىرگى زاماندا بىلىكتى جۇمىسشى – سۇرانىسقا يە، تۇراقتى تابىسى بار جانە ەلدىڭ دامۋىنا تىكەلەي ۇلەس قوساتىن مامان. كوللەدجدەر – بولاشاق ماماندار ۇستاحاناسى دەۋگە بولادى، سەبەبى ءدال وسى جۇمىسشى كادرلاردى دايىندايتىن ءبىلىم بەرۋ ورتالىقتارى.
مەن جۇمامۇراتوۆا ايدانا جۇمىسشى ماماندىقتاردى دايارلايتىن الماتى ەلەكترمەحانيكا كوللەدجىندە ارنايى ءپان وقىتۋشىسى رەتىندە، بولاشاق مامانداردى تاربيەلەۋگە ءوز ۇلەسىمدى قوسىپ كەلەمىن. كوللەدجىمىزدە جىل سايىن 300-دەن استام ءبىلىم الۋشىلار قوعامعا قاجەتتى بىلىكتىلىكتى مەڭگەرىپ شىعۋدا، ولار تەحنيك-ەلەكتريك مەن ەلەكتر مونتاجداۋشى ماماندار. كوللەدجدەر تەك ءبىلىم بەرەتىن ورىن عانا ەمەس، ستۋدەنتتەردىڭ كاسىبي شەبەرلىگىن شىڭداپ، زاماناۋي تەحنولوگيالاردى يگەرۋىنە مۇمكىندىك جاسايتىن ورتا.
الماتى قالاسىن دامىتۋدىڭ 2025 جىلعا دەيىنگى باعدارلاماسىنا سايكەس 2023 جىلى كوللەدج تاراپىنان برازيليانىڭ سان-پاۋلۋ قالاسىنداعى Festo وقۋ ورتالىعىندا كاسىبي بىلىكتىلىگىمدى ارتتىرۋ ماقساتىندا حالىقارالىق تاعىلىمدامادان ءوتتىم. بۇل ساپار بارىسىندا زاماناۋي ادىستەمەلەردى مەڭگەرىپ، وقۋ پروسەسىنىڭ قۇرىلىمى مەن حالىقارالىق دەڭگەيدەگى دايىندىق جۇيەسىمەن تانىستىم. ورتالىقتىڭ جەتەكشىسى گونسالو مورا بىزگە WorldSkills چەمپيوناتىنىڭ ۇيىمداستىرىلۋى تۋرالى جان-جاقتى اقپارات بەرىپ، وقۋ شەبەرحانالارىن كورسەتتى.
قازاقستانعا ورالعان سوڭ، العان ءبىلىمىمدى ارىپتەستەرىممەن ءبولىسىپ، ەكسپەريمەنتالدى توپ رەتىندە ەم-315 الدىم. ءبىلىم الۋشىلارعا جاڭا تەحنولوگيالار مەن ادىستەردى ۇيرەتىپ، كاسىبي داعدىلارىن جەتىلدىرۋگە اتسالىستىم. ءبىلىم الۋشىلاردىڭ ىنتاسىن ارتتىرۋ ماقساتىندا ءتۇرلى جارىستار مەن بايقاۋلار ۇيىمداستىرىپ، ولاردىڭ باسەكەگە قابىلەتتى مامان رەتىندە قالىپتاسۋىنا ۇلەس قوستىم. وسى ەڭبەكتىڭ ناتيجەسىندە، 2025 جىلى گەرمانياعا تاجىريبە الماسۋعا اتتانعان 20 ءبىلىم الۋشىنىڭ 12ء-سى مەنىڭ ەكسپەريمەنتالدى توبىمنان بولدى. بۇل – ورتاق ەڭبەگىمىزدىڭ جەمىسى. قازىرگى ۋاقىتتا شاكىرتتەرىممەن ۇنەمى بايلانىستامىن، Zoom ارقىلى كەزدەسىپ، تاجىريبەلەرىمەن بولىسەمىز. ولاردىڭ كوزدەرىندەگى جالىن مەن جاڭا تەحنولوگيالاردى ۇيرەنۋگە دەگەن قۇشتارلىعى مەن ءۇشىن ەڭ ۇلكەن شابىت.
بۇل جەتىستىك 2025 جىل – جۇمىسشى ماماندىق جىلى اياسىندا تەحنيكالىق جانە كاسىپتىك ءبىلىم بەرۋ سالاسىنداعى ماڭىزدى قادامداردىڭ ءبىرى بولدى. وندىرىستىك تاجىريبەنى حالىقارالىق دەڭگەيدە شىڭداۋ – ەلىمىزدىڭ بىلىكتى جۇمىسشى كادرلارىن دايارلاۋداعى باستى باسىمدىقتارىنىڭ ءبىرى. وسىنداي مۇمكىندىككە جول اشقان كوللەدج باسشىلىعىنا، اتا-انالارعا العىس بىلدىرەمىن. مەن ءوز شاكىرتتەرىمنىڭ بىلىكتى مامان، ءوز ءىسىنىڭ شەبەرى، سۇرانىسقا يە كاسىپ يەسى بولىپ قالىپتاسۋىنا بار كۇشىمدى سالامىن.
ءبىز بۇگىن ءبىلىم مەن تاجىريبە ارقىلى بولاشاقتىڭ ىرگەتاسىن قالاۋدامىز!
جۇمامۇراتوۆا ا.، پەداگوگ-ساراپشى، ارنايى پاندەر وقىتۋشىسى