ناۋرىزدىڭ ەكىنشى سەنبىسى - جەرگە ورنالاستىرۋ، گەودەزيا جانە كارتوگرافيا كۇنى. كاسىبي مەرەكەگە وراي جەر سالاسىندا تالماي ەڭبەك ەتىپ جۇرگەن جۇمىسشى ماماندار ماراپاتتالدى.
شارا اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنىڭ باستاماسىمەن س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ قابىرعاسىندا ءوتتى، دەپ حابارلايدى aqshamnews.kz اۋىل شارۋاشىلىعى مينيسترلىگىنە سىلتەمە جاساپ.
اشىلۋىندا ق ر اشم ۆيسە-مينيسترى ە.تاسجۇرەكوۆ، قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى ز.دۇيسەنبەكوۆ، پارلامەنت ءماجىلىسىنىڭ دەپۋتاتى ن.اشىمبەتوۆ قۇتتىقتاۋ لەبىزدەرىن جەتكىزدى.
«سىزدەردىڭ بىلىكتىلىكتەرىڭىزدىڭ ارقاسىندا جەر رەسۋرستارىن باسقارۋ جۇيەسى جەتىلدىرىلىپ، تۇراقتى دامىپ كەلەدى. زالدا بولاشاق جەرگە ورنالاستىرۋشى، گەودەزيست جانە كارتوگراف مامان بولاتىن ستۋدەنتتەر وتىر. سىزدەر وسى سالانىڭ ەرتەڭى، ەلىمىزدىڭ بولاشاعىسىزدار» - دەدى ەربول تاسجۇرەكوۆ.
شارا بارىسىندا جەر سالاسىندا تالاي جىل ۇزدىكسىز قىزمەت جاساپ كەلە جاتقان ماماندار ەڭبەگى جوعارى باعالاندى. ناتيجەسىندە، 17 ازامات «قۇرمەتتى جەرگە ورنالاستىرۋشى» سالالىق توسبەلگىسىمەن، 29 مامان «ۇزدىك جەرگە ورنالاستىرۋشى» قۇرمەت ديپلومىمەن ماراپاتتالدى.