تامىز توسىن مىنەز تانىتتى
3 تامىز كۇنى گرۋزياداعى Sunset showee قوناق ءۇيىنىڭ جانىندا كوشكىن بولدى. بالشىق ماسساسىنىڭ كولەمى 5 ميلليون تەكشە مەتردەن اسقان. كوشكىن وزەن ارناسىندا دەمالىپ جاتقان تۋريستەرمەن بىرگە كوتتەدجدەردى باسىپ قالعان. وسىعان بايلانىستى گرۋزيانىڭ ىشكى ىستەر مينيسترلىگىنىڭ (ءىىم) سايتىندا مالىمدەمە جاسادى.
«قازىرگى ۋاقىتتا قۇتقارۋشىلار 17 ءمايىتتى تاپتى. قۇتقارۋ وپەراسياسى اياسىندا 200-دەن استام ادام ءقاۋىپسىز جەرگە كوشىرىلدى»، - دەلىنگەن حابارلامادا.
ال گرۋزيا دەنساۋلىق ساقتاۋ مينيسترلىگىنىڭ مالىمدەمەسىنە سايكەس، اپات ايماعىنان تابىلعان 17 ءمايىتتىڭ 16-سى مەديسينالىق تەكسەرۋگە جىبەرىلگەن. ولاردىڭ جەتەۋى ءقازىردىڭ وزىندە انىقتالعان.
اپاتقا بايلانىستى گرۋزيادا 7 تامىز ازا تۇتۋ كۇنى دەپ جاريالاندى.
ال پاكىستاننىڭ وڭتۇستىگىندە پويىز رەلستەن شىعىپ كەتىپ، سالدارىنان 30 ادام قازا تاپقان. 60 ادام ءتۇرلى دەنە جاراقاتىن العان. تەمىرجول قىزمەتىنىڭ جەتەكشىسى ماحمۋدۋر رەحمان لاحو حابارلاعانداي، راۆالپينديگە باراتىن پويىزدىڭ ون ۆاگونى رەلستەن شىعىپ كەتتى، ال كەيبىرەۋلەرى پاكىستاننىڭ ناۆابشاح قالاسىنىڭ ماڭىندا اۋدارىلىپ، كوپتەگەن جولاۋشى قىسىلىپ قالدى.
ساراپشىلاردىڭ پىكىرىنشە، قۇتقارۋ جۇمىستارى كەزىندە قۇربان بولعاندار سانى ارتۋى مۇمكىن.
گەرمانيانىڭ رويتلينگەن قالاسىندا بۇرشاق جاۋىپ، كوشەلەردى قار باستى.
كوشەدەگى قار مەن مۇزدى تازالاۋعا 250 جۇمىسشى جۇمىلدىرىلعان. كەيبىر جەرلەردە قاردىڭ قالىڭدىعى 30 سم جەتكەن.
ال قىتايعا الدىمەن كۇشى وتە قاتتى داۋىل سوعىپ، ارتىنان سۋ باستى. مىنە، كۇنى كەشە اسپان استى ەلىنىڭ شىعىس شاندۋن پروۆينسياسىنىڭ دەدجوۋ قالالىق وكرۋگىنىڭ پينگيۋان وكرۋگىندە 5،5 بالدىق جەر سىلكىنىسى 6 تامىزدا بەيجىڭ ۋاقىتى بويىنشا 2.33-تە ورىن الدى. وشاق 10 مىڭ مەتر تەرەڭدىكتە بولعان. قىتايدىڭ ورتالىق تەلەديدارى پروۆينسيالىق توتەنشە جاعدايلاردى باسقارۋ پۋنكتىنىڭ مالىمەتىنە سايكەس ازىرگە 126 عيمارات قيراپ، 20-دان استام ادام زارداپ شەككەن. شاندۋن پروۆينسياسىنداعى پويىزداردىڭ قوزعالىسى ءىشىنارا توقتاتىلدى. ءورت-قۇتقارۋ جاساقتارى جەر سىلكىنىسىنىڭ ەپيسەنترىنە جىبەرىلگەن.
