الماتىدا 11،2 مىڭ جۇمىس ورنىن قامتيتىن جۇمىسپەن قامتۋ باعدارلامالارىن قارجىلاندىرۋ 40%-عا ۇلعايدى
الماتىدا الەۋمەتتىك قىزمەتتەر ۇيىندە قالا اكىمىنىڭ ورىنباسارى اسەم ءنۇسىپوۆانىڭ، قوعامدىق كەڭەس وكىلدەرىنىڭ، ۇكىمەتتىك ەمەس ۇيىمدار باسشىلارىنىڭ قاتىسۋىمەن جۇمىسپەن قامتۋ باعدارلامالارىن ىسكە اسىرۋ ماسەلەسى بويىنشا كەزدەسۋ ءوتتى، دەپ حابارلايدى almaty-akshamy.kz
الماتى اكىمىنىڭ ورىنباسارى وسى جىلعا ارنالعان باعدارلامالاردى جۇزەگە اسىرۋدىڭ جاڭا تاسىلدەرىن ءتۇسىندىرىپ، كەزدەسۋگە قاتىسۋشىلاردىڭ سۇراقتارىنا جاۋاپ بەردى.
نەگىزىنەن جۇمىسپەن قامتۋ باعدارلامالارى بويىنشا جۇمىس بەرۋشىلەردىڭ تىزبەسىن قالىپتاستىرۋ ولشەمدەرىنە، ەرەكشە قاجەتتىلىگى بار جانداردى جۇمىسقا ورنالاستىرۋ ءۇشىن قوسىمشا جۇمىس ورىندارىن بولۋگە جانە جالاقىعا بولىنەتىن سۋبسيديالاردىڭ مولشەرىنە قاتىستى ماسەلەلەر كوتەرىلدى.
«بيىل جىل باسىندا جۇمىسپەن قامتۋ باعدارلاماسىن ىسكە اسىرۋعا 12 ملرد. تەڭگە قارجى ءبولىندى، بۇل 2023 جىلدىڭ سايكەس كەزەڭىمەن سالىستىرعاندا 40%-عا جوعارى، سونىڭ ارقاسىندا 11،2 مىڭ جۇمىس ورنى قۇرىلادى. قالا اكىمدىگى جۇمىسپەن قامتۋدىڭ بىردە-بىر باعدارلاماسىن قىسقارتقان جوق. سونىمەن قاتار، «الەۋمەتتىك جۇمىس ورنى» باعدارلاماسى بويىنشا جۇمىس ورىندارىنىڭ سانى 380-دەن 500-گە دەيىن كوبەيتىلدى. «قوعامدىق جۇمىستار» باعدارلاماسى بويىنشا 30%-عا ۇلعايىپ، 8.7 ملرد. تەڭگە ءبولىندى»، - دەدى اسەم ءنۇسىپوۆا.
الماتى اكىمى ورىنباسارىنىڭ ايتۋىنشا، بىلتىر جۇمىسپەن قامتۋ باعدارلاماسىنىڭ بيۋدجەتى ەكى رەت تۇزەتىلىپ، بىرنەشە باعىت بويىنشا ەداۋىر ۇلعايعان، الايدا بۇل تاجىريبەنىڭ داۋلى تۇستارى بار ەدى. ونىڭ ايتۋىنشا، بيىل دا تۇزەتۋلەر بولۋى مۇمكىن، ءبىراق بۇل قوسىمشا سۋبسيديالاناتىن جۇمىس ورىندارىنىڭ قاجەتتىلىگىن تەرەڭ تالداۋ ناتيجەسىنە بايلانىستى.
جالپى، 2024 جىلعا ارنالعان جۇمىس بەرۋشىلەردىڭ تىزبەسى جۇمىس بەرۋشىلەر بەرگەن وتىنىمدەر مەن جەرگىلىكتى اتقارۋشى ورگانداردىڭ الەۋمەتتىك پايدالى كاسىپتەر بويىنشا قاجەتتىلىگى نەگىزىندە قالىپتاستىرىلدى. ونى بەكىتۋ كەزىندە جۇمىس بەرۋشىلەردىڭ قاتىسۋ جيىلىگى، ەلەكتروندىق ەڭبەك شارتتارىن جاساسۋ، جالاقى تولەۋ شارتتارى مەن مەرزىمدەرىن ساقتاۋ سياقتى كريتەرييلەر ەسكەرىلدى. اشىقتىقتى قامتاماسىز ەتۋ ءۇشىن ءتىزىم ەڭبەك موبيلدىلىگى ورتالىعىنىڭ سايتىندا (www.ctm-almaty.kz) جاريالانعان.
«سوڭعى جىلداردىڭ قورىتىندىسى بويىنشا جۇمىسپەن قامتۋ باعدارلامالارىن ىسكە اسىرۋدى تالداۋ ءبىر جۇمىس بەرۋشىلەرگە سۋبسيديالار ءجيى بەرىلەتىنىن كورسەتتى. سونىمەن قاتار، جۇمىسسىزداردىڭ ءتىزىمى وزگەرگەن جوق، سەبەبى ولار وزدەرىنىڭ بىلىكتىلىگىن ارتتىرىپ، تۇراقتى جۇمىس ورنىنا ورنالاسقىسى كەلمەدى. وسىعان وراي، جۇمىسپەن قامتۋ جانە الەۋمەتتىك باعدارلامالار باسقارماسى سيفرلىق تەحنولوگيالار ارقىلى باقىلاۋ شارالارىن كۇشەيتتى»، - دەدى اكىمنىڭ ورىنباسارى.
ونىڭ سوزىنشە، بۇل جاۋاپسىز جۇمىس بەرۋشىلەردى انىقتاۋعا جانە جاڭا 2 مىڭ ۇيىمعا باعدارلامالارعا قاتىسۋعا مۇمكىندىك بەردى. ءارى جۇمىسپەن قامتۋ باعدارلامالارىنا قاتىسۋشىلار ءۇشىن «Skills Enbek» پورتالىندا ونلاين وقىتۋ قاراستىرىلعان، بۇل ولاردىڭ مانساپتىق دامۋىن ىنتالاندىرۋعا مۇمكىندىك بەرەدى.
الەۋمەتتىك پايدالى كاسىپتەر بويىنشا بارلىق مەنشىك نىسانىنداعى جۇمىس بەرۋشىلەر ءۇشىن سۋبسيديالاناتىن جۇمىس ورىندارىنا وتىنىمدەر وسى جىلدىڭ قاڭتار ايىنىڭ سوڭىنا دەيىن قابىلداناتىنىن اتاعان ءجون.
بۇل رەتتە، الەۋمەتتىك قىزمەتتەر ۇيىندە دۇيسەنبى كۇنى ساعات 12.00-دە جۇمىسپەن قامتۋ جانە الەۋمەتتىك باعدارلامالار باسقارماسىنىڭ، سونىمەن بىرگە، ەڭبەك موبيلدىلىگى ورتالىعىنىڭ جاۋاپتى لاۋازىمدى ادامدارى بارلىق نورمانى ءتۇسىندىرۋ ءۇشىن ۇەۇ وكىلدەرىمەن جانە جۇمىس بەرۋشىلەرمەن كەزدەسۋلەر وتكىزەدى.