«ارقالىق - نۇر-سۇلتان» باعىتىنداعى جولاۋشىلار پويىزىندا قىز بالا دۇنيەگە كەلدى.
2021 جىلعى 8 قازاندا №603 «ارقالىق - نۇر-سۇلتان» باعىتىنداعى جولاۋشىلار پويىزى ارقالىق ستانسياسىنان جونەلتىلگەننەن كەيىن ەر ادام پويىز بريگاداسىنىڭ قىزمەتكەرلەرىنە زايىبىنىڭ تولعاعى كەلىپ قالعانىن حابارلاعان. بۇل تۋرالى «قازاقستان تەمىر جولى» ۇك»اق باسپا ءسوز قىزمەتى مالىمدەدى، دەپ حابارلايدى Almaty-akshamy.kz.
تورەحان ءابدىرايىموۆ باستاعان پويىز بريگاداسى قىزمەتتىك نۇسقاۋلىققا سايكەس ارەكەتكە كوشىپ، كەلەسى ستانسياعا جەدەل جاردەم شاقىرعان. تەمىر جولدا 8 جىلدان استام ۋاقىت جۇمىس ىستەيتىن، ونىڭ ىشىندە 3 جىلدان بەرى پويىز باستىعى ت.ءابدىرايىموۆ مۇنداي جاعدايمەن ءبىرىنشى رەت بەتپە-بەت كەلگەن.
دارىگەرلەر كەلگەنگە دەيىن تەمىرجولشىلار ايەلدى بوسانۋعا دايىنداي باستادى. جولسەرىكتەر يرينا اندرەيەۆا مەن جاڭىل باتالوۆا جولاۋشىلار اراسىنان تابىلعان دارىگەرلەر سۆەتلانا اياپوۆا (زەينەتتەگى اكۋشەر-گينەكولوگ) جانە گاۋحار قويشىعۇلوۆانىڭ (ەمدەۋ ۇيىمىنىڭ باسشىسى) نۇسقاۋىمەن ارەكەت جاسادى. جۇكتى ايەلدى امان-ەسەن بوساندىرۋ ءۇشىن ۆاگوندا بارلىق قاجەتتى جاعدايلار جاسالدى جانە ءبىراز ۋاقىتتان دۇنيەگە قىز بالا كەلدى،-دەلىنگەن حابارلامادا.
پويىز دەرجاۆينسك بەكەتىنە جەتكەننەن كەيىن جاس انا نۇرايلىم قۇرمانالى مەن ونىڭ شاقالاعىن جولسەرىكتەر جەدەل جاردەم قىزمەتكەرلەرىنە تاپسىردى.
