تۇتقىنداۋ وپەراسياسى پاريجدە 7 قازان كۇنى وتكىزىلگەن.
پاريج پوليسياسى نوتر-دام شىركەۋى عيماراتىن ۇشاقپەن سوقپاق بولدى دەگەن كۇدىكپەن بۇرىنعى ازاماتتىق اۆياسيا ۇشقىشىن تۇتقىندادى، دەپ حابارلايدى Almaty-akshamy.kz قازاقپارات-قا سىلتەمە جاساپ.
بۇل تۋرالى سەنبى كۇنى كەشكىسىن CNews تەلەارناسى پوليسيادان العان دەرەكتەرگە سىلتەمە جاساپ حابارلادى.
تۇتقىنداۋ وپەراسياسى پاريجدە 7 قازان كۇنى وتكىزىلگەن. Air Liberty، Air Tahiti جانە Royal Fly اۋە كومپانيالارىنىڭ بۇرىنعى ۇشقىشىنىڭ تۋىستارى پوليسياعا حابار بەرگەن. 50 جاستاعى ەر ادام كۇيزەلىسكە ۇشىراپ، «تاياۋ ۋاقىتتا ۇشاقپەن نوتر-دامعا بۇزىپ كىرەتىنىن» ءوزى حابارلاعان.
ەلدىڭ وڭتۇستىك-باتىسىندا، انداي قالاسىندا يسپانيامەن شەكاراعا جاقىن ماڭدا تۇرىپ كەلگەن ونىڭ Cessna جەڭىل تۋريستىك ۇشاعى بولعان. پوليسياعا حابار بەرگەن تۋىسى بۇرىنعى ۇشقىشتىڭ پسيحيكالىق جاعدايى اۋىر ەكەنىن ايتقان. انداي قالاسىنىڭ پوليسياسى بۇل دەرەكتى شۇعىل تۇردە پاريجگە جىبەرگەن. بۇرىنعى ۇشقىش فرانسيا استاناسىنان ۇيالى تەلەفونىنداعى گەولوكاسيانىڭ ارقاسىندا تابىلعان. ول ىشىمدىك ءىشىپ، نوتر-دامداعى ورتتەن كەيىن ونىڭ فۋنكسياسىن اتقارىپ جاتقان سان-سيۋلپيس سوبورىنا جاقىن جەردە جۇرگەن.
Le Figaro گازەتىنىڭ مالىمەتىنشە، پاريج پوليسياسى تاياۋ ۋاقىتتا ۇستالۋشىمەن پسيحياتريالىق ساراپتاما جۇرگىزەدى.