بۋرابايدا جوق ءۇيدى جالعا بەرگەن 17 جاستاعى ءجاسوسپىرىم ۇستالدى، دەپ حابارلايدى Aqshamnews.kz ءتىلشىسى Polisia.kz-كە سىلتەمە جاساپ.
قوستاناي وبلىسى پوليسيا دەپارتامەنتىنىڭ كيبەرقىلمىسقا قارسى كۇرەس باسقارماسى ينتەرنەت-الاياقتىق جاسادى دەگەن كۇدىكپەن 17 جاستاعى ءجاسوسپىرىمدى ۇستادى.
تەرگەۋ دەرەكتەرىنە سايكەس، ول بۋرابايدا جالعا بەرىلەتىن ءۇي تۋرالى جالعان حابارلاندىرۋلار جاريالاپ، سەنگەن ازاماتتاردان الدىن الا تولەم العان. مىسالى، ءبىر جابىرلەنۋشى دەمالىس ءۇيىن «برونداۋ» ءۇشىن 60 مىڭ تەڭگە اۋدارعان، ءبىراق كەيىن كۇدىكتى بايلانىسقا شىقپاي قويعان.
جەدەل ىزدەستىرۋ شاراسى كەزىندە ءتارتىپ ساقشىلارى جالعان حابارلاندىرۋ جاريالاۋ ءۇشىن قولدانىلعان تەلەفوندى تاركىلەدى. قازىرگى ۋاقىتتا الاياقتىق دەرەگى بويىنشا سوتقا دەيىنگى تەرگەۋ ءجۇرىپ جاتىر. سونىمەن قاتار پوليسيا كۇدىكتىنىڭ وزگە دە ۇقساس قۇقىق بۇزۋشىلىقتارعا قاتىسى بار-جوعىن تەكسەرىپ جاتىر.
قۇقىق قورعاۋ ورگاندارى ازاماتتارعا ەسكەرتۋ جاسادى: ءۇيدى جالعا الماس بۇرىن اقپاراتتىڭ شىنايىلىعىن تەكسەرىپ، الدىن الا تولەم اۋدارۋعا اسىقپاۋ كەرەك. سونداي-اق زاڭدى كۇشكە يە جازباشا كەلىسىمشارت جاساسقان ءقاۋىپسىز بولادى.