جوو بىتىرگەن جاس ماماندارعا ەڭبەك نارىعىندا سۇرانىس جوق

جوعارى ءبىلىم تۋرالى ديپلومى بار قازاقستاندىق جاستاردىڭ 40%-دان استامى ماماندىعى بويىنشا جۇمىس ىستەمەيدى.

بۇل تۋرالى سەناتتا «جاڭا قازاقستان: جاستار جانە جاڭعىرۋ» تاقىرىبىنداعى پارلامەنتتىك تىڭداۋ كەزىندە سەنات ءتوراعاسى ماۋلەن اشىمبايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«جوعارى ءبىلىمنىڭ دەڭگەيى مەن وعان دەگەن سۇرانىسقا قاتىستى ماسەلەلەر دە از ەمەس. 2021 جىلى قازاقستاندىق جوعارى وقۋ ورىندارىن بىتىرگەن تۇلەكتەردىڭ ۇشتەن ءبىرى ەڭبەك نارىعىندا سۇرانىسقا يە بولماعان. سوعان قاراماستان، ەكونوميكانىڭ ءبىرقاتار سالاسىندا تەحنيكالىق ماماندار مەن بىلىكتى جۇمىسشىلار جەتىسپەي جاتىر»، - دەدى م. اشىمبايەۆ.

سەنات ءتوراعاسى اتاپ وتكەندەي، جاستاردىڭ تاعى ءبىر باستى ماسەلەسى – جۇمىسسىزدىق بولىپ وتىر. جاستار اراسىنداعى جۇمىسسىزدىقتىڭ رەسمي دەڭگەيى سالىستىرمالى تۇردە تومەن، ءبىراق تاۋەلسىز ۇيىمداردىڭ بالاما زەرتتەۋلەرى باسقا مالىمەتتەردى كورسەتەدى.

«تاۋەلسىز ۇيىمداردىڭ ساۋالنامالارىنا سايكەس، 25-29 جاس ارالىعىنداعى توپتا رەسپوندەنتتەردىڭ شامامەن 12%-ى ءالى تۇراقتى جۇمىس ىستەمەگەن. جوعارى ءبىلىم تۋرالى ديپلومى بار قازاقستاندىق جاستاردىڭ 40%-دان استامى ماماندىعى بويىنشا جۇمىس ىستەمەيدى. وسىعان بايلانىستى جۇمىس ورىندارىن قۇرۋعا جانە جاستار پراكتيكاسىنا باعىتتالاتىن بيۋدجەت قاراجاتىن پايدالانۋدىڭ تيىمدىلىگىنە قاتىستى ماسەلەلەر تۋىندايدى»، - دەدى ماۋلەن اشىمبايەۆ.

بۇدان بۇرىن حابارلانعانداي، م.اشىمبايەۆ بارلىق رەفورمانىڭ تۇپكى ماقساتى جاستاردىڭ ءال-اۋقاتىن ارتتىرۋعا ءارى ولاردىڭ دامۋىنا جاعداي جاساۋعا ارنالعانىن اتاپ ءوتتى.