ۇكىمەت وتىرىسىندا پرەمەر-مينيستردىڭ ورىنباسارى قانات بوزىمبايەۆتىڭ ۇلىتاۋ وبلىسىنداعى «جومارت» كەنىشىندەگى اپاتتىڭ سەبەپتەرىن تەكسەرۋ جانە قازا تاپقانداردىڭ وتباسىلارىنا كومەك كورسەتۋ جونىندەگى ۇكىمەتتىك كوميسسيا جۇمىسىنىڭ بارىسى تۋرالى بايانداماسى تىڭدالدى.
وسى جىلدىڭ 17 اقپانىندا قازاقمىس كورپوراسياسىنىڭ «جومارت» كەنىشىنىڭ شاحتاسىندا اپات بولدى. 7 ادام قازا تاپتى. بۇل رەتتە 402 ادام ءوز بەتىنشە ەۆاكۋاسيالاندى، دەپ حابارلايدى aqshamnews.kz ۇكىمەتتىڭ Telegram-كانالىنا سىلتەمە جاساپ.
اتالعان فاكتى بويىنشا سوتقا دەيىنگى تەرگەۋ باستالدى. اپات ورنىندا توتەنشە جاعدايلار مينيسترلىگىنىڭ اۋماقتىق جەدەل شتابى اشىلدى. سەنىم تەلەفونى جەلىسىنە 23 قوڭىراۋ ءتۇستى. پرەمەر-مينيسترگە ۇكىمەتتىك كوميسسيا اپاتتىڭ سەبەپتەرىن تەرگەۋ بويىنشا جۇمىستى باستاعانى، ءتيىستى ساراپتامالار جۇرگىزىلەتىنى باياندالدى.
الدىن الا مالىمەتتەر بويىنشا شاحتادا تابيعي گاز جارىلعان. كوميسسيا باسشىسى مەن مۇشەلەرى اپات بولعان جەردى قاراپ، قازا تاپقانداردىڭ وتباسىلارىمەن كەزدەسۋ وتكىزدى. ءقازىر شاحتادا جۇمىس توقتاتىلدى. ەكى ارنايى كوميسسيا قۇرىلدى: بىرەۋى اپاتتىڭ سەبەپتەرىن انىقتاۋى كەرەك، ەكىنشىسى قاۋىپسىزدىك ەرەجەلەرىنىڭ بۇزىلعانىن انىقتايدى. كوميسسيالار ءوز جۇمىسىن 10 كۇن ىشىندە اياقتاۋعا ءتيىس.
مەملەكەت باسشىسىنىڭ تاپسىرماسى بويىنشا قازا تاپقانداردىڭ وتباسىلارىنا قاجەتتى قولداۋ شارالارى كورسەتىلەدى. سونداي-اق قازاقمىس كورپوراسياسى ۇجىمدىق شارتقا سايكەس كومەك كورسەتەدى، ونىڭ ىشىندە جەرلەۋدى ۇيىمداستىرۋ، جىلدىق ورتاشا جالاقىنىڭ 10 ەسەلەنگەن تولەمى، بالالاردىڭ وقۋ اقىسىن تولەۋ، قازا تاپقان قىزمەتكەرلەردىڭ نەسيەلەرى مەن قارىزدارىن وتەۋ بويىنشا كومەك تۇرلەرى بار. بۇدان باسقا، قولدانىستاعى زاڭناما اياسىندا كەنشىلەر وتباسىنا بيۋدجەتتەن مەملەكەتتىك جاردەماقىلار جانە اسىراۋشىسىنان ايىرىلۋ بويىنشا الەۋمەتتىك ساقتاندىرۋ مەملەكەتتىك قورىنان الەۋمەتتىك تولەمدەر تاعايىندالادى، سونداي-اق جەرلەۋگە تولەمدەر بەرىلەتىن بولادى. جالپى تەرگەۋ ناتيجەلەرى كوميسسيا جۇمىسىنىڭ قورىتىندىسى بويىنشا ۇسىنىلاتىن بولادى.