كولىك ينفراقۇرىلىمىنىڭ جاڭا پەرسپەكتيۆالارى: بەيجىڭنىڭ ءىرى كومپانياسى CRCC الماتىدا مەترو قۇرىلىسىنا قاتىسۋعا دايىن ەكەندىگىن ءبىلدىردى
الماتى اكىمى ەربولات دوسايەۆ جۇڭگو حالىق رەسپۋبليكاسىنا (قحر) جۇمىس ساپارى اياسىندا China Railway Construction Corporation (CRCC) باسقارما ءتوراعاسى داي حەگەنمەن كەزدەسۋ وتكىزدى، ونىڭ بارىسىندا تاراپتار كولىك ينفراقۇرىلىمى جانە اۋقىمدى قۇرىلىس جوبالارىن ىسكە اسىرۋ سالاسىنداعى ىقتيمال ىنتىماقتاستىق پەرسپەكتيۆالارىن تالقىلادى، دەپ حابارلايدى aqshamnews.kz.
ايتا كەتەيىك، CRCC الەمدەگى ەڭ ءىرى تەحنيكا ءوندىرۋشى، ەڭ قۋاتتى جانە اۋقىمدى حالىقارالىق قۇرىلىس كورپوراسيالارىنىڭ ءبىرى بولىپ تابىلادى. 2024 جىلى CRCC كورپوراسياسى Fortune Global-500 رەيتينگىندە 43ء-شى ورىنعا يە بولدى. كومپانيا قحر-دا تەمىرجولداردىڭ ۇشتەن ەكىسىن جانە مەترونىڭ بەستەن ءۇش بولىگىن سالدى. CRCC-دە 700-دەن استام بىرلىكتەگى قالقانى پارك بار. قۇراستىرمالى مەتالل كونسترۋكسيا بولىپ تابىلاتىن بۇل جوعارى تەحنولوگيالىق ماشينالار مەترو جانە باسقا دا جەراستى قۇرىلىستاردى سالۋ بويىنشا جۇمىستاردى ءتيىمدى جانە ءقاۋىپسىز جۇرگىزۋگە مۇمكىندىك بەرەدى.
CRCC ء-تىڭ نەگىزگى بولىمشەسى-20-شى بيۋرو (China Railway 20th Bureau Group Co.). 20-شى بيۋرودا 16 مىڭنان استام قىزمەتكەر جۇمىس ىستەيدى. 70 جىل ىشىندە بۇل ۇيىم بۇكىل الەم بويىنشا مىڭداعان ءىرى ينفراقۇرىلىمدىق جوبالاردى جۇزەگە اسىردى. 20-شى بيۋرونىڭ فيليالى قازاقستاندا 2015 جىلدان بەرى جۇمىس ىستەپ كەلەدى.
كەزدەسۋ بارىسىندا ەربولات دوسايەۆ الماتىنىڭ ۇزىندىعى 13،4 كم ءارى 11 ستانسياسى بار مەترو جۇمىس ىستەيتىن قازاقستاننىڭ جالعىز قالاسى ەكەنىن حابارلادى. قولدانىستاعى جەلىلەردى كەڭەيتۋ جانە باتىس جانە شىعىس باعىتتاردا مەترونىڭ ەكى تارماعىن سالۋ بويىنشا جۇمىستار جۇرگىزۋ جوسپارلانۋدا.
«الماتى ءۇشىن مەتروپوليتەن جەلىلەرىن سالۋ جونىندەگى جوبانى قىسقا مەرزىمدە ىسكە اسىرۋ ماڭىزدى باسىمدىقتاردىڭ ءبىرى بولىپ تابىلادى. وسىعان بايلانىستى، قۇرىلىس اياسىندا الەۋەتتى سەرىكتەستەر ءتىزىمىن قالىپتاستىرۋ كەزىندە ءبىز ەڭ الدىمەن قىتايلىق كومپانيالاردىڭ، ونىڭ ىشىندە كەز كەلگەن جوبالاردى «كىلتپەن» تاپسىراتىن ءارى ساپالى ىسكە اسىرۋعا سەنىمدىلىك بەرەتىن CRCC كورپوراسياسىنىڭ تاجىريبەسى مەن مۇمكىندىكتەرىن زەرتتەدىك. بۇل ەكى ەل اراسىنداعى ساۋدا-ەكونوميكالىق بايلانىستاردى ودان ءارى نىعايتۋعا ەلەۋلى ۇلەس قوسادى»، - دەپ اتاپ ءوتتى ەربولات دوسايەۆ.
CRCC باسقارما ءتوراعاسى داي حەگەن ىنتىماقتاستىققا قىزىعۋشىلىق ءبىلدىرىپ، CRCC كومپانياسى قازاقستاندا جالپى سوماسى شامامەن 650 ملن اقش دوللارىن قۇرايتىن ءبىرقاتار اۋقىمدى ينفراقۇرىلىمدىق جوبالاردى ىسكە اسىرىپ جاتقانىن اتاپ ءوتتى.
«CRCC قىتايدا جەتەكشى ورىنعا يە جانە ءارقاشان ىنتىماقتاستىققا اشىق. بۇگىن بىرنەشە قىتايلىق كومپانيالار الماتىدا جوبانى ىسكە اسىرۋعا قاتىسۋدى جوسپارلاپ وتىر جانە ءبىز تەڭ شارتتارمەن باسەكەلەسۋگە نيەتتىمىز. باي تاجىريبەنىڭ ارقاسىندا الماتىدا جوبالاردى ءساتتى جۇزەگە اسىرامىز دەپ ۇمىتتەنەمىز"، - دەدى داي حەگەن.
ايتا كەتەيىك، الماتىدا مەتروپوليتەن سالۋ ماسەلەسى تالقىلاۋ ساتىسىندا تۇر. كەزدەسۋ قورىتىندىسى بويىنشا تاراپتار ديالوگتى جالعاستىرۋ جانە ودان ءارى جەمىستى ىنتىماقتاستىق تۋرالى كەلىستى.