رەسپۋبليكا اۋماعىندا جالپى ۇزىندىعى 13 مىڭ شاقىرىمعا جۋىق سەگىز ترانزيتتىك اۆتوكولىك ءدالىزى بار، دەپ حابارلايدى BAQ.KZ ۇكىمەتتىڭ رەسمي سايتىنا سىلتەمە جاساپ.
قازىرگى ۋاقىتتا «الماتى – تالدىقورعان – وسكەمەن – شەمونايحا – رف شەكاراسى» (768 كم)، «اقتوبە – اتىراۋ – رف شەكاراسى» (746 كم)، «مايقاپشاعاي – قالباتاۋ – سەمەي – پاۆلودار – رف شەكاراسى» (415 كم) جانە «الماتى – استانا – پەتروپاۆل – رف شەكاراسى» (31 كم) تراسسالارىندا جوندەۋ جۇمىستارى ءجۇرىپ جاتىر.
2030 جىلعا دەيىن «باتىس ەۋروپا – باتىس جۇڭگو» (1 363 كم) جانە «استانا – قوستاناي – رف شەكاراسى» (830 كم) دالىزدەرى مەن «اتىراۋ – ورال – رف شەكاراسى» (587 كم) تراسسالارىن ءى تەحنيكالىق ساناتقا سايكەستەندىرىپ جاڭارتۋ جوسپارلانىپ وتىر.
پرەمەر-مينيستر بۇل جۇمىستى كورشىلەس ەلدەردىڭ ۋاكىلەتتى مەملەكەتتىك ورگاندارىمەن ۇيلەستىرە وتىرىپ، رەسەي مەن قىتايعا قاراي لوگيستيكالىق باعىتتاردى جانە ترانسكاسپيي حالىقارالىق كولىك باعىتىن دامىتۋدى جانداندىرۋ قاجەتتىگىن اتاپ ءوتتى.
ۇكىمەت باسشىسىنىڭ ايتۋىنشا، اتالعان ءتاسىل مەملەكەتتەر اراسىنداعى اۆتوجولداردىڭ تۇيىسكەن جەرىندەگى «تار جولداردى» تەزىرەك جويۋعا جانە سونىڭ ارقاسىندا جۇك اينالىمىن ەداۋىر ارتتىرۋعا مۇمكىندىك بەرەدى.