اسكەري ۇشقىشتاردىڭ، مۇعالىمدەر مەن دارىگەرلەردىڭ جالاقىسى كوتەرىلەدى

جالاقى 30%-دان اسا كوتەرىلەدى.

قورعانىس ءمينيسترىنىڭ ورىنباسارى سۇلتان كامالەتدينوۆ سەنات وتىرىسىندا اسكەري-اۋە كۇشتەرىنىڭ ۇشقىشتارى، اسكەري جوعارى وقۋ ورىندارىنىڭ وقىتۋشىلارى مەن اسكەري دارىگەرلەردىڭ جالاقىسى 30%-دان استامعا وسەتىنىن مالىمدەدى، دەپ حابارلايدى Almaty-akshamy.kz

قورعانىس ءمينيسترى ورىنباسارىنىڭ ايتۋىنشا، بۇگىندە كەيبىر اسكەريلەردىڭ جالاقىسىن كوتەرۋ تۋرالى ۇسىنىستار قولداۋ تاپتى.

"ۇكىمەت مىناداي باستامالاردى قولدادى: اسكەري-اۋە كۇشتەرى ۇشقىشتارىنىڭ جالاقىسى ءوستى. بيىل اسكەري جوعارى وقۋ ورىندارىنىڭ پروفەسسورلىق-وقىتۋشىلىق قۇرامىنىڭ جالاقىسىن ازاماتتىق جوعارى وقۋ ورىندارىنىڭ دەڭگەيىنە دەيىن كوتەرۋ ماسەلەسى شەشىلىپ جاتىر. اسكەري قىزمەتكەرلەردىڭ كەلەسى ساناتى – اسكەري دارىگەرلەر. جالاقىنى ازاماتتىق سەكتورداعى مەديسينا قىزمەتكەرلەرىنىڭ دەڭگەيىنە دەيىن كوتەرۋ دە ۇكىمەت تاراپىنان قاراستىرىلىپ، قولداۋ كورسەتىلىپ جاتىر. جالاقى 30%-دان اسا كوتەرىلەدى"، دەدى سۇلتان كامالەتدينوۆ.

ول كەيىنگى جالاقى ءارتۇرلى كورسەتكىشتەرگە، سونىڭ ىشىندە اسكەري اتاققا، لاۋازىمعا، ۇشۋ ۋاقىتى مەن كلاسىنا بايلانىستى ەكەنىن اتاپ ءوتتى.