كولىك ۆيسە-مينيسترى ساتجان ابلالييەۆ كاۆكاز جانە ورتالىق ازيا قۇرىلىس فورۋمىنىڭ اشىلۋىندا قازاقستان جولدارىن باعالاۋ باعدارلاماسى — KazRAP-تىڭ ىسكە قوسىلعانىن جاريالادى.
بۇل باستاما جول قوزعالىسى قاۋىپسىزدىگىن قامتاماسىز ەتۋ مەن اۆتوجولداردىڭ جاعدايىن جاقسارتۋعا باعىتتالعان جۇيەلى ءتاسىلدى كوزدەيدى، دەپ حابارلايدى aqshamnews.kz.
KazRAP - جول ينفراقۇرىلىمىنىڭ قاۋىپسىزدىگىن ارتتىرۋ بويىنشا ۇلتتىق جۇيەنىڭ نەگىزگى ەلەمەنتىنە اينالادى. باعدارلاما جولداردىڭ جاي-كۇيىن حالىقارالىق ادىستەمەگە سۇيەنە تاۋەلسىز باعالاۋدى، جول-كولىك وقيعالارىن الدىن-الۋعا، ينۆەستيسيالاردىڭ تيىمدىلىگىنە مونيتورينگ جۇرگىزۋدى جانە جول قاۋىپسىزدىگى سالاسىنداعى ستراتەگيالىق جوسپارلاۋدى كوزدەيدى.
باعدارلاما حالىقارالىق جولداردى باعالاۋ باعدارلاماسىمەن (iRAP) بىرلەسە جۇزەگە اسىرىلادى.
كەلىسىمگە كازنييبدد ديرەكتورى ارىستان ماسانوۆ پەن iRAP-تىڭ اتقارۋشى باس ديرەكتورى گرەگ سميت قول قويدى.
سونىمەن قاتار، فورۋمنىڭ اشىلۋىندا ۆيسە-مينيستر ۆەدومستۆونىڭ قازىرگى جانە جوسپارلانىپ وتىرعان باستامالارىنا دا توقتالىپ، حالىقارالىق كولىك دالىزدەرىن دامىتۋعا، جول ينفراقۇرىلىمىن جاڭعىرتۋعا، سيفرلىق تەحنولوگيالاردى ەنگىزۋگە جانە سالانىڭ ينۆەستيسيالىق تارتىمدىلىعىن ارتتىرۋعا باسا ءمان بەرىلەتىنىن اتاپ ءوتتى.
فورۋمعا مەملەكەتتىك ورگانداردىڭ، جەكە سەكتوردىڭ، ينجەنەرلىك قاۋىمداستىق پەن زاڭ سالاسىنىڭ وكىلدەرىنەن تۇراتىن 20 ەلدەن 120 قاتىسۋشى جينالدى.
ەكى كۇن ىشىندە 9 تاقىرىپتىق پانەلدىك سەسسيا ءوتتى. ولار ءىرى ينفراقۇرىلىمدىق جوبالاردى ىسكە اسىرۋ، حالىقارالىق قارجى ينستيتۋتتارىنىڭ قاتىسۋى، جول قاۋىپسىزدىگى ينجەنەرياسى، FIDIC ستاندارتتارى بويىنشا كەلىسىمشارتتاردى دايىنداۋ، داۋلاردى شەشۋ كەڭەستەرىنىڭ قىزمەتى، حالىقارالىق اربيتراج جانە قۇرىلىس سالاسىنداعى كاسىبي الەۋەتتى دامىتۋ ماسەلەلەرىن قامتيدى.