الماتىدا جەرگىلىكتى دەڭگەيدە ماتەريالدىق ەمەس مادەني مۇرانى ساقتاۋ جانە ورنىقتى دامىتۋ ماسەلەلەرىنە ارنالعان قازاقستاندىق ساراپشىلارعا ارنالعان اپتالىق ۇلتتىق ترەنينگ ءوتىپ جاتىر.
بۇل ءىس-شارا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ تاۋەلسىزدىك پەن ەگەمەندىكتىڭ نەگىزى سانالاتىن ۇلتتىق بىرەگەيلىكتى نىعايتۋ جونىندەگى تاپسىرمالارىن ىسكە اسىرۋ اياسىندا ۇيىمداستىرىلدى، دەپ حابارلايدى aqshamnews.kz/
ءىس-شارانىڭ اشىلۋ راسىمىنە مەملەكەتتىك جانە قوعامدىق قۇرىلىمداردىڭ وكىلدەرى، عالىمدار، مادەنيەت قايراتكەرلەرى مەن حالىقارالىق سەرىكتەستەر قاتىستى. ترەنينگكە قازاقستاننىڭ بەس پيلوتتىق وڭىرىنەن كەلگەن 45 مامان، سونداي-اق مۇراجايلاردىڭ، شىعارماشىلىق ۇيىمداردىڭ جانە ءداستۇرلى سپورت تۇرلەرى قاۋىمداستىقتارىنىڭ وكىلدەرى قاتىسۋدا.
ءىس-شارانى قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسى مەن ازيا-تىنىق مۇحيتى وڭىرىندەگى ماتەريالدىق ەمەس مادەني مۇرا سالاسىنداعى يۋنەسكو وڭىرلىك وقۋ ورتالىعى (بەيجىڭ، قحر) بىرلەسە ۇيىمداستىرۋدا.
ماتەريالدىق ەمەس مادەني مۇرا – اۋىزشا داستۇرلەر مەن ەپوستار، ادەت-عۇرىپتار، ءداستۇرلى ويىندار، قولونەر، مۋزىكا مەن بي، ۇلتتىق تاعامدار مەن حالىقتىق جارىستار سياقتى ۇرپاقتان ۇرپاققا بەرىلەتىن ءتىرى مادەنيەت. جاھاندانۋ ۇدەرىسى كۇشەيگەن سايىن بۇل مادەني قۇندىلىقتاردىڭ جويىلىپ كەتۋ ءقاۋپى دە باسىم. 2003 جىلى يۋنەسكو ماتەريالدىق ەمەس مادەني مۇرانى قورعاۋ تۋرالى كونۆەنسيانى قابىلداپ، مەملەكەتتەردىڭ كۇش-جىگەرىن بىرىكتىرۋگە باستاماشى بولا وتىرىپ، وسى مۇرانى ساقتاۋعا جانە بولاشاق ۇرپاققا جەتكىزۋگە ىقپال ەتىپ كەلەدى.
وقۋ باعدارلاماسى مامانداردىڭ بىلىكتىلىگىن ارتتىرۋعا، قۇجاتتامانى نەعۇرلىم ءدال جۇرگىزۋگە، سونداي-اق كوشپەلى وركەنيەتتىڭ مادەني بولمىسىنىڭ اجىراماس بولىگى سانالاتىن وسى مۇرانى كەڭىنەن ناسيحاتتاۋعا باعىتتالعان.