الماتى قالاسى قوعامدىق دامۋ باسقارماسىنىڭ قوعامدىق دامۋ ورتالىعى باستاماسىمەن «كىتاپ – اسىل قازىنا» ادەبي جوباسى اياسىندا قازاق ادەبيەتى مەن رۋحانياتىنىڭ كورنەكتى وكىلى، اقىن، اۋدارماشى، پۋبليسيست، مادەنيەت قايراتكەرى ەرجان الاشتۋعاننىڭ شىعارماشىلىعىنا ارنالعان «جولدار مەن حاتتار...» اتتى ادەبي بەنەفيس ءوتتى.
ءىس-شارا كىتاپ وقۋ مادەنيەتىن قالىپتاستىرۋ، كوركەم ادەبيەتتىڭ ادام ساناسىنا اسەرىن ناسيحاتتاۋ، وسكەلەڭ ۇرپاقتىڭ كىتاپقا، پوەزياعا دەگەن قىزىعۋشىلىعىن ارتتىرۋ. سونىمەن قاتار، قازاقستاندىق قالامگەرلەردىڭ شىعارماشىلىعىن تانىتۋ، ادەبيەتتى قوعامدىق ساناعا ورنىقتىرۋ، ۇلت رۋحانياتىن بايىتۋعا ۇلەس قوسۋ ماقساتىندا ۇيىمداستىرىلعان.
ءىس-شارا ەركىن فورماتتا ءوتتى. ادەبي بەنەفيس اياسىندا اقىننىڭ شىعارماشىلىعىنا ارنالعان پوەتيكالىق كومپوزيسيالارى ۇسىنىلدى. سونىمەن قاتار ادەبي بەنەفيسكە قوعام جانە مادەنيەت قايراتكەرلەرى، كومپوزيتورلار، ادەبيەتتانۋشىلار مەن جاس قالامگەرلەر قاتىسىپ، شىعارماشىلىق تۋرالى پىكىر الماستى.
- «جولدار مەن حاتتار» دەگەن مەنىڭ قازىرگى شىعارماشىلىعىمنىڭ كونسەپسياسى دەسە بولادى. سەبەبى مەنىڭ كەيىنگى 10 جىلداعى ءومىرىم – جولداردا، ال جاقىندارىممەن حابارلاسۋىم – حاتتاردا ءوتتى. بۇگىنگى كەش جالقى ادام تۋرالى، جالقى ادامنىڭ جالپىعا قاتىسى تۋرالى جانە جالپىنىڭ جالقىعا اسەرى تۋرالى. كەيىنگى 4-5 جىلدىڭ كولەمىندە حالىقارالىق ۇلكەن جوبانى اياقتادىق. تمد مەملەكەتتەرىنىڭ زاماناۋي ادەبيەتى تۋرالى 5 تومدىقتى ازىرلەدىك. كەزىندە ۇستازىم نىعمەت عابدۋللينگە «ءبىز الەم ادەبيەتىن ورىس تىلىندە وقىعان ەڭ سوڭعى بۋىن بولايىقشى» دەپ بەرگەن ۋادەم بار ەدى. سول ۋادەنى ورىنداۋعا تىرىسىپ جاتىرمىن. ءقازىر دۇنيەجۇزى پوەزياسىنىڭ قازاق تىلىندەگى ءتاجىماسىن – «جاھار جىرى» دەگەن 3 تومدىقتى دايىنداپ بولدىق. سونى ادەبيەت، جۋرناليستيكا فاكۋلتەتتەرىنە ۇسىنامىز، – دەدى ەرجان الاشتۋعان.
ايتا كەتكەن ءجون، ەرجان الاشتۋعان – حالىقارالىق «الاش» ادەبي سىيلىعىنىڭ لاۋرەاتى، تۇركسوي ارنايى سىيلىعىنىڭ جانە تۇركى الەمى ادەبيەتشىلەرى بىرلەستىگىنىڭ اتاتۇرىك اتىنداعى سىيلىعىنىڭ يەگەرى، حالىقارالىق «زاماناۋي ادەبيەت» جوباسىنىڭ ۇيلەستىرۋشى-رەداكتورى، «AR» باسپا ءۇيىنىڭ جەتەكشىسى جانە «الەم ادەبيەتى» جۋرنالىنىڭ باس رەداكتورى.
