دەنساۋلىق ساقتاۋ مينيسترلىگى ق ر پرەمەر-مينيسترىنىڭ تاپسىرماسى بويىنشا وقۋ-اعارتۋ مينيسترلىگىمەن، قازاق تاعامتانۋ اكادەمياسىمەن، يۋنيسەف جانە ددۇ-مەن بىرلەسىپ 2025 جىلعى 1 قىركۇيەكتەن باستاپ كۇشىنە ەنەتىن مەكتەپتەگى تاماقتانۋدىڭ جاڭا ستاندارتى مەن كوپ نۇسقالى ۇلگىلىك ءمازىردى ازىرلەپ، بەكىتتى.
بۇل تۋرالى Aqshamnews.kz دەنساۋلىق ساقتاۋ مينيسترلىگىنە سىلتەمە جاساي وتىرىپ حابارلايدى.
«ءمازىر بالالاردىڭ فيزيولوگيالىق قاجەتتىلىكتەرى مەن كالورياسىن ەسكەرە وتىرىپ جاسالعان، وندا جاس ساناتتارى، ماۋسىمدىق، سونداي-اق اس بلوگى جوق مەكتەپتەردەگى بالالاردىڭ تاماقتانۋى ەسكەرىلگەن. ستاندارت سونداي-اق شاعىن جيناقتالعان مەكتەپتەردە، بۋفەتتەردە تاماقتانۋدى ۇيىمداستىرۋعا جانە قانت ديابەتى، تاماق اللەرگياسى، سەلياكيا اۋرۋى، لاكتوزا جەتكىلىكسىزدىگى جانە باسقا دا اۋرۋلار سياقتى ەرەكشە ديەتالىق قاجەتتىلىكتەرى بار بالالاردى تاماقتاندىرۋعا قويىلاتىن تالاپتاردى قامتيدى»،-دەدى ق ر دسم سانيتاريالىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى روزا قوجاپوۆا بۇگىن ماڭعىستاۋ وبلىسىندا وتكەن كەڭەستە سويلەگەن سوزىندە.
قۇجات مەكتەپكە دەيىنگى، ورتا، تەحنيكالىق جانە كاسىپتىك، سونداي-اق ءبىلىم بەرۋ-ساۋىقتىرۋ ۇيىمدارىندا تاماقتانۋدى ۇيىمداستىرۋدىڭ ءبىرىڭعاي تاسىلدەرىن قالىپتاستىرۋعا باعىتتالعان.
جاڭا ستاندارتقا سايكەس ديەتادا قانت، تۇز جانە ماي مولشەرى ەداۋىر ازايادى، قۇرامىندا تابيعي ەمەس ونىمدەر مەن تۇز بەن قانت كوپ بولاتىن ونىمدەر (شۇجىق ونىمدەرى، ىستالعان ەت، قانت قوسىلعان شىرىندار، سپرەدتەر، ءدام مەن ءيىستى كۇشەيتكىشى بار ونىمدەر جانە ت.ب.) الىنىپ تاستالادى، جاڭا پىسكەن كوكونىستەردىڭ، جەمىستەردىڭ جانە تابيعي ونىمدەردىڭ ۇلەسى ارتادى.
اس بلوگى جوق شاعىن جيناقتالعان مەكتەپتەردە ىستىق بۋتەربرودتان، اشىتىلعان ءسۇت ونىمىنەن (يوگۋرت)، ماۋسىمدىق جەمىستەردەن جانە سۋسىننان (ءسۇت، ايران، يتمۇرىن سۋسىنى، كەپتىرىلگەن جەمىستەر، جيدەكتەردەن) تۇراتىن لانچ-پاكەتتەر دايىندالادى.
قازىرگى ۋاقىتتا مەكتەپ اكىمشىلىكتەرىن، مەديسينا قىزمەتكەرلەرىن، تاماقتانۋ قىزمەتتەرىن جەتكىزۋشىلەردى جانە براكەراجدىق كوميسسيانىڭ مۇشەلەرىن ونلاين وقىتۋ جۇرگىزىلۋدە. كەيىننەن مەكتەپكە دەيىنگى بالالار ۇيىمدارىنىڭ قىزمەتكەرلەرىن وقىتۋ جوسپارلانعان.
ازىرلەنگەن ءمازىر سانەپيدباقىلاۋ كوميتەتىنىڭ رەسمي سايتىندا ورنالاستىرىلدى جانە ءبىلىم باسقارمالارى مەن بيزنەس سۋبەكتىلەرىن حاباردار ەتۋ ءۇشىن وقۋ-اعارتۋ مينيسترلىگىنە جىبەرىلدى.