تالاي جىلدان بەرى ايتىلىپ تا، جازىلىپ تا كەلە جاتقان، جاۋىر بولعان تاقىرىپقا تاعى دا توقتالعاندى ءجون سانادىق. ماقسات - ماسەلەنىڭ ءتۇيىنى مامانداردا ەكەنىن ايتۋ.
«جىل سايىن قازىنادان قوماقتى قاراجات جۇمسالىپ، جول توسەمىمەن جەرگە «كومە» سالادى. ءبىراق، ناتيجەگە كەلگەندە، «ايداعانىڭ بەس ەشكى، ىسقىرىعىڭ جەر جارادىنىڭ» كەرى. سالىنعان جولداردىڭ ساپاسى سىن كوتەرمەيدى» دەگەن پىكىرلەر دە ايتىلىپ جاتادى. مۇمكىن، ورىندى ايتىلعان وي شىعار. قاي-قايسىمىز دا الىستى جاقىنداتىپ، دىتتەگەن جەرىمىزگە تەز جەتكىزەتىن تاقتايداي ءتۇزۋ جولداردىڭ بولعانىن قالايمىز. الايدا بارلىعى ءبىز ويلاعانداي سونشالىق كۇردەلى مە؟! ءۇمىتتىڭ تابى بىلىنبەيدى دەگەنگە ىشتەي يلانعىڭ دا كەلمەيدى ەكەن. حوش. تەرە بەرگەنگە ءمىن ەش ۋاقىت تۇگەسىلمەيدى.
«كوشىڭ كولىكتى بولسىن!» دەپ باتا بەرەدى قازاق. ال كولىكتىڭ كۇرەجولسىز كۇنى قاراڭ ەكەنى، سايكەسىنشە، كەز كەلگەن مەملەكەتتىڭ ەكونوميكاسى وسى ينفراقۇرىلىمسىز دامي المايتىنى، كوشى قارقىندى ىلگەرىلەمەيتىنى لاجسىز دۇنيە. جول ساپاسى حالىقتىڭ تۇرمىس دەڭگەيىنە، ەكونوميكانىڭ دامۋىنا تىكەلەي اسەر ەتىپ قويماي، ەلدىڭ الەۋمەتتىك-ساياسي جاي-كۇيىندە دە ماڭىزدى ءرول اتقارادى. كولىك جولدارى كەڭەيگەن سايىن مەملەكەتتىڭ وركەندەۋىنىڭ، حالىقتىڭ ءال-اۋقاتىنىڭ جاڭا كوكجيەكتەرى، زور مۇمكىندىكتەرى اشىلا تۇسپەك. بىلاي قاراعاندا، بارلىعى ايدان انىق بولىپ كورىنەدى. «ال ىسكە اسىرۋعا كەلگەندە نەگە تۇرالاپ قالامىز؟» دەگەن زاڭدى ساۋال تۋىندايدى. مۇمكىن مامانداردىڭ بىلىكتىلىگى جەتىسپەيتىن شىعار.
ەلىمىزدەگى جول سالاسىنىڭ عالىمدارى اۆتوجول قۇرىلىسى بويىنشا جۇڭگو ەلىنىڭ تاجىريبەسىن ۇيرەنىپ جاتىر، دەپ حابارلايدى Almaty-akshamy.kz.
دەلەگاسيانىڭ قۇرامىندا ينستيتۋتتىڭ ۆيسە-پرەزيدەنتى سەرىك ومىربايەۆ، جول-قۇرىلىس ماتەريالدارى جانە جاڭا تەحنولوگيالار دەپارتامەنتىنىڭ ديرەكتورى اسەل نۇعمانوۆا جانە باسقا دا ماماندار بار.
جۇمىس بارىسىنداعى كەزدەسۋلەردىڭ بىرىندە ينستيتۋت وكىلدەرى سزيانسۋ كولىك ينستيتۋتىمەن (Jiangsu Transportation Institute) ىنتىماقتاستىق تۋرالى مەموراندۋمعا قول قويدى.
JSTI-مەن ارادا ىنتىماقتاستىق تۋرالى مەموراندۋمعا قول قويىلىپ، ەكى ەلدىڭ جول-زەرتتەۋ ينستيتۋتىن قۇرىپ، ۇيىمداستىرۋ ماسەلەلەرى تالقىلاندى. قىتايداعى نورماتيۆتىك-تەحنيكالىق بازانى رەفورمالاۋ ماسەلەلەرى قارالىپ، جاڭا تەحنولوگيالاردى ەنگىزۋ ءتارتىبى زەرتتەلدى. سونداي-اق تىعىز ىنتىماقتاستىقتى ارتتىرۋ جونىندەگى الداعى جوسپارلار پىسىقتالدى، - دەدى نۇعمانوۆا.
ەستەرىڭىزگە سالا كەتەيىك، «قازجولعزي» اق ەلىمىزدەگى اۆتوجول سالاسىنىڭ نورماتيۆتىك-تەحنيكالىق بازاسىن رەفورمالاۋ بويىنشا جۇمىستاردى جۇرگىزىپ كەلەدى. ۇيىمنىڭ ساراپشىلارى جاڭا تەحنولوگيالار مەن الەمدىك تاجىريبەنى ەسكەرە وتىرىپ، جول سالاسىنىڭ نورماتيۆتىك بازاسىنىڭ جاڭا قۇرىلىمىن ازىرلەپ جاتىر. اتالعان مىندەت تاياۋ جانە الىس شەت ەلدەردىڭ وزىق تاجىريبەسى نەگىزىندە جۇزەگە اسىرىلماق. وسىعان بايلانىستى جوعارىدا اتالعان مەموراندۋم جاساۋ بويىنشا باستاما كوتەرىلدى.
جول سالاسىنىڭ ساراپشىلارى كەيىنگى 10 جىلدا قحر-دا جول قۇرىلىسى ساپاسىنىڭ ايتارلىقتاي وسكەنىن اتاپ ءوتتى. وسى رەتتە قىتايدىڭ جۇردەك اۆتوموبيل جولدارى مەن باسقا دا جوعارى دەڭگەيلى اۆتوكولىك جولدارىن ايتارلىقتاي جىلدام دامىتۋدا تاجىريبەسى مول ەكەنىن ايتا كەتكەن ورىندى.