ءبىزدىڭ الدىمىزدا 2025 جىلدىڭ سوڭىنا دەيىن حالىقتىڭ 100% تازا اۋىز سۋمەن قامتاماسىز ەتۋ مىندەتى تۇر - ۇكىمەت باسشىسى.
ۇكىمەت وتىرىسىندا پرەمەر-مينيستر ءاليحان سمايىلوۆ وسىنداي دەرەك كەلتىردى، دەپ حابارلايدى Almaty-akshamy.kz.
ءقازىر بۇل كورسەتكىش قالالاردا - 98%، اۋىلدىق ەلدى مەكەندەردە 94% قۇراپ وتىر.
«اسا ماڭىزدى جۇمىستاردىڭ ءبىرى – ەلدەگى سۋ رەسۋرستارىنىڭ تاپشىلىعىن شەشۋ.
پرەزيدەنت ەلىمىزدىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەستە اتاپ وتكەندەي، قازاقستان 2050 جىلعا قاراي «سۋعا وتە مۇقتاج» ەلدەردىڭ ساناتىنا كىرۋى مۇمكىن.
ءقازىر ەلىمىزدە 600 مىڭنان استام ادام تازا اۋىزسۋ ماسەلەسىن شەشۋدى تالاپ ەتەدى»، - دەدى ۇكىمەت باسشىسى.
سونداي-اق ءا.سمايىلوۆ وزگە وڭىرلەردى قويىپ، استانانىڭ وزىندە سۋ تاپشىلىعى قاتتى سەزىلە باستاعانىن ەسكە سالدى.
«بۇل رەتتە، سۋدى ۇنەمدەۋ ماڭىزدى ماسەلە بولىپ وتىر. وكىنىشكە قاراي، كوپتەگەن ازاماتتارىمىز سۋدى ۇنەمدەگىسى كەلمەيدى. بۇل ماسەلەنى شەشۋ ءۇشىن سالانى سيفرلاندىرۋ جانە ءتيىمدى تاريفتەردى ەنگىزۋ قاجەت.
وسى ماسەلەنىڭ ءبارىن جاڭا سۋ كودەكسى مەن باعدارلامالىق قۇجاتتاردى دايىنداۋ كەزىندە ەسكەرۋ قاجەت»، - دەدى ءاليحان سمايىلوۆ.