الماتىدا جول قوزعالىسىنىڭ قاۋىپسىزدىگىن قامتاماسىز ەتۋدى كوزدەيتىن كەشەندى ءىس-شارالار قولعا الىندى: 1 جەلتوقساننان 1 ناۋرىزعا دەيىن ەلەكترساموكاتتى پايدالانۋعا تولىق تىيىم سالىنىپ، وپەراتورلارعا كولىكتى كوشەدەن الىپ تاستاۋ مىندەتتەلدى.
سونىمەن قاتار پوليسيا جۇرگىزۋشىلەردەن باستاپ جاياۋ جۇرگىنشىلەر مەن كولىكتىڭ بالاما تۇرىمەن جۇرەتىندەرگە دەيىن بارلىعىنا باقىلاۋدى كۇشەيتپەك، - دەپ حابارلايدى Aqshamnews.kz.
بۇل تۋرالى وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسىندا الماتى قالاسى پد اكىمشىلىك پوليسيا باسقارماسى باسشىسىنىڭ ورىنباسارى تيمۋر سەرىك ۇلى حابارلادى.
ونىڭ ايتۋىنشا، قالادا ەلەكترساموكات، موپەد پەن ەلەكترۆەلوسيپەدكە وتىرعاندار كوبەيگەندىكتەن جۇيەلى تۇردە باقىلاپ، ۋاقىتىلى وقىس وقيعانىڭ الدىن الىپ وتىرۋعا تۋرا كەلەدى. بيىل دا جول ەرەجەسىن بۇزعانداردىڭ كوبى جۇرگىزۋشىلەردىڭ ءوزى بولىپتى: بەينەكامەرا ارقىلى شامامەن 4 ملن قۇقىقبۇزۋشىلىق تىركەلسە، تاعى 567 965 جاعدايدى پاترۋلدىك قىزمەت انىقتاعان. ونىڭ 518 355ء-ىن جۇرگىزۋشىلەر، 49 610-ىن جاياۋ جۇرگىنشىلەر، 17 154ء-ىن ەلەكترساموكات پەن 623ء-ىن ەلەكترۆەلوسيپەد مىنگەندەر جاساعان.
پوليسيانىڭ ايتۋىنشا، قىسقى ماۋسىمدا ەلەكتروساموكاتتاردىڭ جۇمىسىن توقتاتۋ جاراقات الۋ ءقاۋپىن ايتارلىقتاي تومەندەتىپ، قوزعالىستىڭ قاۋىپسىزدىگىن قامتاماسىز ەتپەك. كولىكتىڭ بالاما ءتۇرىن پايدالاناتىندارعا ارنالعان قوسىمشا پروفيلاكتيكالىق ءىس-شارالار جول جاعدايىنا جاسالعان تالداۋ نەگىزىندە جاڭا ماۋسىمنىڭ باسىندا انىقتالاتىن بولادى.
ءال-فارابي، سەيفۋللين مەن تولە بي سياقتى ادام كوپ جۇرەتىن كوشەدە جىلدامدىقتى ارتتىرعانى ءۇشىن جاۋاپكەرشىلىكتى كۇشەيتۋ جاعى ازىرگە قاراستىرىلا قويعان جوق. ءبىراق ءدال وسى ۇزىن ءارى جۇكتەمەسى جوعارى كوشەدە جول اپاتى ءجيى تىركەلەدى. ونداي جەرلەرگە پوليسيا قوسىمشا كامەرا قويىپ، ساقشىلاردى كۇشەيتىپ، جكو سەبەپتەرىن ۋاقىتىلى تالداپ وتىرادى.
جاسوسپىرىمدەرگە دە كوپ كوڭىل بولىنگەن، سەبەبى ولار ساموكات پەن ۆەلوسيپەدتى ءجيى پايدالانادى. مەكتەپتە سەمينار، ترەنينگتەر، جول قوزعالىسى ەرەجەسى بويىنشا ساباق وتكىزىلەدى، يۋيد سىنىپتارى جۇمىس ىستەيدى، وندا بالالارعا جولدا قالاي ءجۇرىپ-تۇرۋ كەرەكتىگىن ۇيرەتەدى. بۇل جۇمىس جىل بويى جالعاسىپ، بالالاردىڭ جاراقات الۋىن ازايتۋعا كادىمگىدەي كومەگى ءتيىپ جاتىر.
الماتىلىقتار دا ءتارتىپ ساقتاۋعا بەلسەندى اتسالىسا باستادى: كۇن سايىن 102 قىزمەتىنە شامامەن 300 ءوتىنىش، ءموبيلدى قوسىمشا ارقىلى تاعى 100 شاقتى حابارلاما تۇسەدى. كوبىنە تۇرعىندار كولىكتى دۇرىس قاڭتارماي، ماس كۇيدە رولگە وتىرىپ، قارسى باعىتقا شىعىپ، قىزىلعا ءوتىپ كەتكەندەردى حابارلاپ ايتادى. ءار حابارلامانى جاقىن ماڭداعى ساقشى دەرەۋ تەكسەرەدى.
پوليسيا جاياۋ جۇرگىنشىلەر اراسىنداعى قۇقىقبۇزۋشىلىقتىڭ الدىن الۋ ءۇشىن مەكتەپتەر، بازارلار مەن ساۋدا ورتالىقتارىنىڭ ماڭىندا كەزەكشىلىكتى كۇشەيتىپ، «جاياۋ جۇرگىنشى»، «نازار اۋدارىڭىزدار، بالالار!» اكسياسىن وتكىزىپ ءجۇر. قازىرگە دەيىن 49 610 جاياۋ جۇرگىنشى جاۋاپقا تارتىلعان.
سۋىق تۇسكەندىكتەن جۇرگىزۋشىلەر 1 جەلتوقسانعا دەيىن قىسقى دوڭگەلەكتى اۋىستىرۋى كەرەك. كوممۋنالدىق قىزمەتتەر كوشە مەن تروتۋارلارعا كوكتايعاقتان قورعايتىن قوسپا سەۋىپ، تازالاپ جاتىر. بۇل ءۇشىن قالادا ارناۋلى تەحنيكانىڭ جەتكىلىكتى قورى بار. وسىنىڭ بارلىعى قىسقى كەزەڭدە جول-كولىك وقيعاسىن ازايتىپ، قاۋىپسىزدىكتى ارتتىرۋعا باعىتتالعان.