الماتىلىقتارعا قوعامدىق كولىكتە تولەم جاساۋدىڭ بالاما جولدارى تۋرالى ەسكە سالىندى.
بۇل شارالار ءبىرىنشى كەزەكتە ازاماتتارعا ىڭعايلى بولۋ ءۇشىن ەنگىزىلگەن، سونىمەن قاتار بيلەتسىز ءجۇرۋ فاكتىلەرىن ازايتۋعا مۇمكىندىك بەرەتىنىن وڭىرلىك كوممۋنيكاسيالار قىزمەتىنىڭ الاڭىندا پايدالانۋ جونىندەگى ديرەكتوردىڭ ورىنباسارى ابىلايحان ومارحان مەن «الماتىەلەكتروترانس» ج ش س باقىلاۋ-تەكسەرۋ قىزمەتىنىڭ باسشىسى ولجاس قابييەۆ ايتتى، دەپ حابارلايدى Almaty-akshamy.kz.
بۇگىندە الماتىدا قوعامدىق كولىكپەن ءجۇرۋ اقىسىن تولەۋدىڭ بىرنەشە ءتۇرى بار:
1. ONAY كولىك كارتاسىنىڭ كومگىمەن جول اقىسىن تولەۋ؛
2. ONAY ءموبيلدى قوسىمشاسىن ۆيرتۋالدى كارتامەن پايدالانا وتىرىپ، تىركەۋ تەرمينالىنداعى QR كودىن سكانەرلەۋ ارقىلى نەمەسە ءموبيلدى قوسىمشادا تىركەۋ تەرمينالىندا كورسەتىلگەن 6 ساندىق كولىك كودىن ەنگىزۋ ارقىلى، SQR كودىن سكانەرلەۋ نەمەسە ءموبيلدى قوسىمشادا قوعامدىق كولىكتە كورسەتىلگەن 7 تاڭبالى ساندىق كودتى ەنگىزۋ ارقىلى؛
3) SMS-تولەم؛
4) Beeline ابونەنتتەرى ءموبيلدى تەلەفوندا *9909# نەمەسە *202# كومانداسىن تەرۋ ارقىلى USSD-كودتى پايدالانۋعا بولادى؛
5) كولىك جۇرگىزۋشىسىنە قولما-قول تولەم جاساۋ ارقىلى. مۇنداي جاعدايدا جول ءجۇرۋ اقىسى – 150 تەڭگە بولادى، ودان كەيىن جۇرگىزۋشى جولاۋشىعا ONAY-دىڭ قاعاز بيلەتىن بەرەدى.
جول اقىسىن تولەۋدەن جالتارۋ ماسەلەسىنە كەلسەك، «الماتىەلەكتروترانس» تاسىمالداۋشىسىنىڭ مالىمەتى بويىنشا، قالالىق باعىتتاردا تولەم جاساماۋ جاعدايى شامامەن 20%-دى قۇرايدى. ءتورت جىل بۇرىن قالالىق باعىتتار بويىنشا جولاقىسىن تولەمەۋ 30 پايىزعا جۋىق بولسا، قالا ماڭىنداعى مارشرۋتتاردا بۇل كورسەتكىش 70 پايىزعا جەتكەن.
«ءبىراق بۇل كورسەتكىشتىڭ ءوزى ايتارلىقتاي اۋقىمدى. بۇل كومپانيانىڭ، ايتالىق، كوبىرەك اۆتوبۋستار الۋىنا، قوسالقى بولشەكتەردى ساتىپ الۋىنا اسەر ەتەدى. جوسپارلاۋ كريتەرييلەرىنىڭ ءبىرى بولىپ سانالاتىن جولاۋشىلار اعىنىن ءدال انىقتاۋعا مۇمكىندىك بەرمەيدى. ول بارلىق پروسەستەرگە اسەر ەتەدى. ياعني، تولەمنەن جالتارۋ ارقىلى مۇنداي جولاۋشىلار ءبىرىنشى كەزەكتە وزدەرىنە جانە باسقا دا وسىعان ۇقساس جولاۋشىلارعا زيان كەلتىرەدى. ءبىراق بارلىق جولاۋشىلار بىردەي جول اقىسىن تولەۋدەن جالتارادى دەۋگە بولمايدى. ولار تەگىن ءجۇرۋ دەگەن بولمايتىنىن دا جاقسى تۇسىنەدى. ماسەلەن، جەدەل جەلى تەلەفونىنا تولەم جاساماعان جولاۋشىلاردىڭ سۋرەتتەرى ءجيى تۇسەدى. تولەمەگەندەردى جولاۋشىلاردىڭ وزدەرى سوگىپ، بەتىنە ايتىپ جاتاتىنداي جاعدايلار بار»، - دەپ ءبولىستى ا.ومارحان.
قازىرگى ۋاقىتتا بيلەتسىز جول جۇرگەنى ءۇشىن سالىناتىن ايىپپۇل مولشەرى - 2 اەك. بيلەتسىز جۇرەتىن جولاۋشىلاردى كۇندەلىكتى باقىلاۋ جانە تەكسەرۋ جۇمىستارىن 50 مامان جۇرگىزەدى. ولاردىڭ مىندەتتەرىنە جولاۋشىلاردىڭ تولەم جاساۋ فاكتىلەرىن تەكسەرۋ، سونداي-اق قولدانىستاعى تولەم تۇرلەرىن ءتۇسىندىرۋ كىرەدى.
سونىمەن قاتار، بيلەت تەكسەرۋشى مامان جولاۋشى تاراپىنان تاسىمالداۋ ەرەجەلەرىن بۇزۋ فاكتىلەرى ورىن السا، ونى ءتۇسىرىپ كەتۋگە قۇقىلى. مىسالى، جولاۋشى ءيتتى تۇمىلدىرىقسىز جانە قارعى باۋسىز تاسىمالداسا نەمەسە ءوزى ماس بولسا.
جولاۋشى تولەۋدەن، تەكسەرۋشىنىڭ تالاپتارىنا باعىنۋدان باس تارتقان جاعدايلاردا، نۇسقاۋلىققا سايكەس، ول پوليسيانىڭ اكىمشىلىك ايىپپۇل سالۋى ءۇشىن 102 نومىرىنە قوڭىراۋ شالۋعا قۇقىلى. وسىلايشا، جىل باسىنان بەرى تاسىمالداۋ بارىسىن تەكسەرۋشى 113 رەت قوڭىراۋ شالىپ، پوليسەيلەر جولاۋشىلارعا تيىسىنشە 113 حاتتاما تولتىرعان.
تولەمەۋ فاكتىلەرىنىڭ ازايۋ ديناميكاسىنا قاراماستان، قالاداعى جاعداي ساقتالۋدا. تاسىمالداۋشىلار جولاۋشىنىڭ جول اقىسىن ۋاقىتىندا تولەۋ مىندەتىن تۇرعىندارعا قاتاڭ ەسكەرتەدى، سەبەبى بۇل اۆتوبۋس پاركىن ۇستاۋعا تىكەلەي اسەر ەتەدى.