جول اپاتىنان قازا تاپقان بالالاردىڭ سانى كوبەيگەن

ءىىم اتا-انالارعا ەسكەرتۋ جاسادى.

جىل باسىنان بەرى جول اپاتىنان قازا تاپقان بالالاردىڭ سانى 14%-عا، ال زارداپ شەككەن بالالاردىڭ سانى 3%-عا ارتتى، دەپ حابارلايدى Almaty-akshamy.kz

اكىمشىلىك پوليسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆانىڭ ايتۋىنشا، بالالاردىڭ جولداعى قاۋىپسىزدىگى، اسىرەسە، وقۋ جىلى كەزىندە وزەكتى ماسەلەگە اينالادى. رەسمي مالىمەتكە سايكەس، جىل باسىنان بەرى جول اپاتىنان قازا تاپقان بالالاردىڭ سانى 14%-عا، ال زارداپ شەككەن بالالاردىڭ سانى 3%-عا ارتىپ وتىر.

"زارداپ شەككەن بالالاردىڭ جارتىسىنان كوبى – جولاۋشىلار، ال قالعاندارى جاياۋ جۇرگىنشىلەر بولدى. كوپ جاعدايدا بالالار ەرەسەكتەر تاراپىنان تاسىمالداۋ ەرەجەلەرىن بۇزعانى ءۇشىن زارداپ شەگەدى. سەبەبى ولار اۆتوورىندىقتار، بۋستەرلەر جانە اداپتەرلەر سياقتى قورعانىس قۇرىلعىلارىن پايدالانبايدى"، - دەدى بورانوۆا.

بۇگىندە پوليسەيلەر جاياۋ جۇرگىنشىلەر كىنالى بولاتىن جول اپاتتارىنىڭ نەگىزگى سەبەپتەرىن دە انىقتادى. ولار:

بەلگىلەنبەگەن جەردەن جولدى كەسىپ ءوتۋ؛

جاقىنداپ قالعان كولىكتىڭ الدىنان جۇگىرىپ ءوتۋ؛

باعدارشامنىڭ تىيىم سالىنعان سيگنالىنا ءوتۋ.

بالانىڭ جولداعى مىنەز-قۇلقى كوپ جاعدايدا اتا-اناسىنا بايلانىستى. بالا كورگەنىن ىستەيدى. اتا-انالار جول قاۋىپسىزدىگى ەرەجەلەرى تۋرالى سويلەسىپ قانا قويماي، وزدەرى دە ساقتاسا، بالا جول ەرەجەسىن بۇزبايتىن ەدى.