الماتى وبلىسىنىڭ اۆتوجولدارىندا جىل باسىنان بەرى 171 جول-كولىك وقيعاسى بولىپ، 31 ادام قازا تاپتى.
213 تۇرعىن ءتۇرلى دارەجەدەگى دەنە جاراقاتىن الدى. وكىنىشكە قاراي، جول اپاتىنان جاپا شەككەندەردىڭ 21ء-ى – كامەلەتكە جاسى تولماعان بالالار. جۇرگىزۋشىلەر اراسىندا ىشىمدىك ءىشىپ كولىك تىزگىندەۋ، جىلدامدىقتى شامادان تىس ارتتىرۋ، جولدىڭ قارسى بەتىنە شىعىپ كەتۋ سياقتى زاڭسىزدىقتار ازايماي تۇر، دەپ حابارلايدى Almaty-akshamy.kz 24.kz-كە سىلتەمە جاساپ.
قونايەۆ قالاسىنىڭ كوشەلەرىنە 53 «سەرگەك» كامەراسى ورناتىلعان. كۇن سايىن 7 اۆتوپاترۋل مارشرۋتقا شىعادى. وبلىس ورتالعىندا سوڭعى ەكى ايدىڭ ىشىندە جول ءجۇرۋ ەرەجەسىن بۇزعاندارعا 2 ملن تەڭگەدەن استام ايىپپۇل سالىنعان.
«جول-پاترۋلدىك پوليسيا قىزمەتكەرلەرىمەن 24815 اكىمشىلىك حاتتاما تولتىرىلدى. اتاپ ايتساق، ونىڭ ىشىندە 130 ادام ماس كۇيىندە اۆتوكولىگىن باسقارعانى ءۇشىن، جاياۋ جۇرگىنشىلەر جانە باسقا دا جول قوزعالىسىنا قاتىسۋشىلاردىڭ جول قوزعالىسى ەرەجەلەرىن بۇزعانى ءۇشىن 2770 حاتتاما تولتىرىلدى. الماتى وبلىسىنىڭ پوليسيا دەپارتامەنتى سىزدەردەن جولداردا وتە مۇقيات بولۋدى سۇرايدى»، - دەيدى وبلىستىق پد جەرگىلىكتى پوليسيا قىزمەتى باسقارماسىنىڭ باستىعى مۇرات قالياسقاروۆ.