جولاۋشىلارعا 270 مىڭنان اسا ورىن ۇسىنىلادى.
قتج پاۆلودار، شىمكەنت جانە قىزىلوردادان الاكولگە دەيىن ءبىرجولعى پويىزداردى ۇيىمداستىرۋ ماسەلەسىن قاراستىرۋعا دايىن، دەپ حابارلايدى Almaty-akshamy.kz "قازاقستان تەمىر جولى" كومپانياسىنىڭ باسپا ءسوز قىزمەتىنە سىلتەمە جاساپ.
بيىل جاز مەزگىلىندە الاكول باعىتىندا قاتىنايتىن پويىزداردا 270 مىڭنان استام ورىن ۇسىنىلادى. قتج سوڭعى جىلدارى كول باعىتىنداعى پويىز ساپارلارىنا سۇرانىس ارتىپ كەلە جاتقانىن اتاپ ءوتتى. بىلتىر الاكولگە تەمىرجول كولىگىمەن 254 مىڭ جولاۋشى تاسىمالدانعان. بۇل كورسەتكىش 2020 جىلعى دەڭگەيدەن ەكى ەسە ءوستى.
"الداعى جازدا پويىزداردا ۇسىنىلعان ورىنداردىڭ سانى 16 مىڭعا ارتىپ، 270 مىڭنان اسادى"، - دەلىنگەن حابارلامادا.
جولاۋشىلارعا ىڭعايلى بولۋ ءۇشىن استانا، الماتى، شىعىس قازاقستان جانە اباي وبلىستارىنان 11 مارشرۋت الاكول باعىتىندا جۇرەدى. كۋرورتتىق ايماققا جىبەرىلەتىن پويىزدار قۇرامىنا نەگىزىنەن اۋا باپتاعىشتارى بار جىلجىمالى قۇرامدار كىرەدى.
ايالدامالار تۋريستەر ءۇشىن ەڭ تانىمال ورىنداردا – جالاڭاشكول، اقشي، بەسكول ستانسيالارىندا قاراستىرىلعان.
"تۋريستىك ماۋسىمنىڭ قىزعان شاعىندا جالاڭاشكول ستانسياسىنىڭ ۆوكزالىندا جولاۋشىلار اعىنى تاۋلىگىنە 800 جۋىق جولاۋشىنى، اقشي – تاۋلىگىنە 550-گە جۋىق جولاۋشىنى، بەسكول – تاۋلىگىنە 220-عا جۋىق جولاۋشىنى قۇرايدى. جولاۋشىلار اعىنىنىڭ ۇلعايۋىن ەسكەرە وتىرىپ، ستانسيالاردىڭ ۆوكزالىندا جولاۋشىلاردىڭ جايلى جانە ءقاۋىپسىز بولۋى ءۇشىن جاعداي جاسالادى"، - دەدى كومپانيا وكىلدەرى.