الماتىدا «كەلەشەك مەكتەپتەرى» باعدارلاماسى اياسىندا تاعى ەكى زاماناۋي مەكتەپ سالىندى
ءارقايسىسى 2000 وقۋشىعا ارنالعان بۇل جاڭا ءبىلىم وردالارى پرەزيدەنت قاسىم-جومارت توقايەۆتىڭ تاپسىرماسىمەن جۇزەگە اسىرىلىپ وتىرعان «كەلەشەك مەكتەپتەرى» ۇلتتىق باعدارلاماسى اياسىندا بوي كوتەردى، دەپ حابارلايدى Aqshamnews.kz.
BCN Group (BAZIS Construction) مەدەۋ اۋدانىندا، قۇلجا تاس جولىنان وڭتۇستىككە قاراي ورنالاسقان «شىعىس قاقپاسى» جاڭا پوليسەنترىنىڭ اۋماعىندا №220 مەكتەپتى سالدى. ال الاتاۋ اۋدانىنداعى س. اشيموۆ كوشەسىندە ورنالاسقان №222 مەكتەپتى BAZIS-A Corp. كومپانياسى تۇرعىزدى.
داستۇرگە ساي، جاڭا وقۋ جىلىنىڭ قارساڭىندا كومپانيالار بولاشاق وقۋشىلار مەن ولاردىڭ اتا-انالارىنا ارناپ اشىق ەسىك كۇندەرىن وتكىزدى. قوناقتار مەكتەپتەردىڭ ساۋلەتتىك جانە ينتەرەرلىك شەشىمدەرىن تاماشالاپ، زاماناۋي تەحنيكالىق جابدىقتاردى سىناپ كورۋ مۇمكىندىگىنە يە بولدى.
جالپى اۋدانى 18 مىڭ شارشى مەتردى قۇرايتىن ءۇش قاباتتى عيماراتتار نەبارى توعىز ايدىڭ ىشىندە سالىنىپ، كەلىسىمشارتتا كورسەتىلگەن مەرزىمنەن بۇرىن – بيىلعى جەلتوقسانعا دەيىن پايدالانۋعا بەرىلدى. ءار مەكتەپ 13 بلوكتان تۇرادى، باستاۋىش، ورتا جانە جوعارى بۋىنعا بولىنگەن، ءتورت جەكە كىرەبەرىسى بار.
مەكتەپتەردە 440 ورىندىق كەڭ اسحانالار، 430 ورىندىق اكت زالدارى بار. بۇل زالداردىڭ جايلىلىعى زاماناۋي كينوتەاترلار دەڭگەيىنە سايكەس، سونداي-اق مۇمكىندىگى شەكتەۋلى بالالارعا ارنالعان ارنايى ايماقتار قاراستىرىلعان. سونىمەن قاتار، تابيعي جارىق تۇسەتىن كەڭ كىتاپحانالار، دەمالىس جانە وقۋ ايماقتارى، بالالاردىڭ جان-جاقتى دەنە دامۋىنا ارنالعان زاماناۋي سپورت زالدارى جابدىقتالعان.
№220 مەكتەپتىڭ ديرەكتورى مانات اشيربەكوۆا اتاپ وتكەندەي، جاڭا ءبىلىم ورداسىندا بالالار تەك ءداستۇرلى اكادەميالىق ءبىلىم الىپ قانا قويماي، سونىمەن بىرگە وزدەرىنىڭ جەكە قابىلەتتەرىن، تالانتتارى مەن دارىنىن دامىتۋعا بارلىق مۇمكىندىككە يە بولادى:
«شىعارماشىلىقپەن اينالىسۋعا، اكتەرلىك شەبەرلىكتى مەڭگەرۋگە، ومىرلىك جاعدايلاردى شەشۋدىڭ تىڭ جولدارىن تابۋعا بارلىق جاعداي جاسالعان»، – دەدى ول.
بۇل مەكتەپكە مەدەۋ اۋدانىنىڭ «دۋمان»، «دۋمان-2»، «اتىراۋ»، «كەنساي» جانە «الاتاۋ» شاعىناۋداندارىندا تۇراتىن بالالار بارادى. بۇل شەشىم №64، 98 جانە 99 مەكتەپتەرىندەگى وقۋشى جۇكتەمەسىن ەداۋىر ازايتادى.
ال الاتاۋ اۋدانىنداعى №222 مەكتەپتىڭ قۇرىلىسى كەزىندە ينتەرەردى كوركەمدەۋگە ەرەكشە كوڭىل ءبولىندى. اعىلشىن ءتىلى كابينەتتەرىنىڭ جانىندا ايگىلى بيگ-بەن، قىزىل تەلەفون بۋدكاسى جانە ۇلىبريتانيا تۋى بەينەلەنگەن. باستاۋىش سىنىپ وقۋشىلارى ءۇشىن قابىرعالاردا ماتەماتيكالىق مىسالدار، ءالىپبي جانە «ءبىلىم اعاشى» ورنالاستىرىلدى. تاريح كابينەتى جانىندا قوجا احمەت ياساۋي كەسەنەسىنىڭ سۋرەتتەرى، كەرۋەن جولى، كارتا جانە شوقان ءۋاليحانوۆ، اباي قۇنانبايەۆ، ىبىراي التىنسارين، ستيۆ دجوبس سىندى ۇلى تۇلعالاردىڭ قاناتتى سوزدەرى جازىلدى.
№222 مەكتەپتىڭ ماتەماتيكا ءپانى ءمۇعالىمى تاڭشولپان مومىنقۇلوۆا:
«مەكتەپ وتە ساپالى، جان-جۇرەكپەن سالىنعان. بارلىق جاعداي ويلاستىرىلعان. قۇرىلىسشىلارعا جانە مەملەكەتكە ۇلكەن العىسىمىزدى بىلدىرەمىز»، – دەدى.
اتا-انالار مەن بالالار جاڭا مەكتەپتەرگە ەرەكشە قۋانىپ، جاڭا وقۋ جىلىن اسىعا كۇتۋدە. بولاشاق وقۋشىلاردىڭ انالارى اكتوتى جۇباتقان قىزى مەن مايگۇل ساركىتبەك قىزى جاڭا مەكتەپتىڭ جابدىقتالۋى مەن كومپيۋتەرلىك قامتىلۋى كەيبىر جەكەمەنشىك ءبىلىم بەرۋ ورىندارىنان دا جوعارى ەكەنىن ايتتى.
BCN Group (BAZIS Construction) جانە BAZIS-A Corp. كومپانيالارىنىڭ مالىمدەۋىنشە، مەكتەپتەردىڭ قۇرىلىسى كەزىندە سەيسميكالىق جانە ءورت قاۋىپسىزدىگى تالاپتارىن قوسا العاندا، ەڭ جوعارى ساپا جانە قاۋىپسىزدىك ستاندارتتارى ساقتالعان. عيماراتتار بەينەباقىلاۋ كامەرالارىمەن، دابىل تۇيمەلەرىمەن جابدىقتالعان جانە ينكليۋزيا تالاپتارىنا تولىق سايكەس كەلەدى: پاندۋستاردان باستاپ ارنايى ليفتىلەرگە دەيىن.
مەكتەپتەر جوباسىن ءساتتى ىسكە اسىرۋعا «Samruk-Kazyna Construction» اق تاپسىرىس بەرۋشى رەتىندە قاجەتتى قولداۋ كورسەتتى.