2023-2024 وقۋ جىلىنا جوعارى وقۋ ورىندارىنا ءتۇسۋ ءۇشىن قۇجاتتاردى قابىلداۋ 20 ماۋسىم مەن 25 تامىز ارالىعىندا جۇرەدى. 13-20 شىلدەدە ءبىلىم بەرۋ گرانتتارىنىڭ كونكۋرسىنا ءوتىنىش قابىلداۋ وتەدى، دەپ حابارلايدى عىلىم جانە جوعارى ءبىلىم مينيسترلىگىنىڭ باسپا ءسوز قىزمەتى.
وتاندىق جوو-لارعا وقۋعا ءتۇسۋ ءۇشىن تالاپكەرلەر جەكە كۋالىك، ۇبت سەرتيفيكاتىن، 3ح4 كولەمىندەگى فوتو، ورتا ءبىلىم تۋرالى اتتەستات (تەحنيكالىق جانە كاسىپتىك ءبىلىم بەرۋ (تجكب) ۇيىمدارىنىڭ تۇلەكتەرى ءۇشىن ديپلوم)، №075/ۋ نىسانىنداعى مەديسينالىق انىقتاما، ەر جىگىتتەر ءۇشىن اسكەري تىركەلۋ كۋالىگىن تاپسىرۋ كەرەك. سونداي-اق، جەڭىلدەتىلگەن سانات بويىنشا كونكۋرسقا قاتىسۋ ءۇشىن راستايتىن قۇجاتتار ۇسىنىلادى.
وقۋعا تۇسۋشىلەر 18 مامىردا باستالىپ، 5 شىلدەگە دەيىن وتەتىن ۇبت-نىڭ ەكى ناتيجەسىنىڭ بىرەۋىن گرانت كونكۋرسىنا ۇسىنا الادى. ءبىلىم بەرۋ گرانتى يەگەرلەرىنىڭ ءتىزىمى 10 تامىزعا دەيىن جاريالانادى.
ايتا كەتسەك، «پەداگوگيكالىق عىلىمدار» جانە «دەنساۋلىق ساقتاۋ» ءبىلىم بەرۋ سالالارى بويىنشا قابىلداۋ ارناۋلى ەمتيحان ناتيجەلەرى ەسەپكە الىنا وتىرىپ جۇرگىزىلەدى. بۇل ەمتيحان جوو بازاسىندا 20 ماۋسىم مەن 20 تامىز ارالىعىندا وتكىزىلەدى.
شىعارماشىلىق ەمتيحاندارعا قاتىسۋ ءۇشىن وتىنىشتەردى جوو-لار 20 ماۋسىمنان 7 شىلدەگە دەيىن قابىلدايدى، ەمتيحانداردىڭ ءوزى 8-15 شىلدە ارالىعىندا وتەدى.