الماتىدا ەربولات دوسايەۆتىڭ تاپسىرماسىمەن ماۋسىم ايىندا اۋقىمدى ينفراقۇرىلىمدىق جوبانىڭ قۇرىلىسى باستالادى
الماتى اكىمى ەربولات دوسايەۆتىڭ تاپسىرماسى بويىنشا بيىلعى جىلدىڭ ماۋسىم ايىندا بوستاندىق اۋدانىنىڭ ەرمەنساي شاعىن اۋدانىندا «ەرمەنساي» سۋ جيناعىش قۇرىلعىسىنىڭ قۇرىلىسى باستالادى. بۇل تۋرالى الماتىنىڭ ەنەرگەتيكا جانە سۋمەن جابدىقتاۋ باسقارماسى حابارلادى.
جاڭا نىساننىڭ ونىمدىلىگى تاۋلىگىنە 9 مىڭ تەكشە مەتر سۋ. جوبا اياسىندا تاراتۋ جەلىلەرىنىڭ قۇرىلىسى دا كوزدەلگەن. بۇل 2026 جىلدىڭ سوڭىنا دەيىن ەرمەنساي جانە نۇرلىتاۋ شاعىن اۋداندارىنىڭ 25 مىڭنان استام تۇرعىنىن ساپالى ورتالىقتاندىرىلعان اۋىز سۋمەن قامتاماسىز ەتۋگە مۇمكىندىك بەرەدى، وسىلايشا بۇل ايماقتاعى كوپ جىلدان بەرگى سۋ تاپشىلىعى ماسەلەسى شەشىلەدى.
تاريحي تۇرعىدان العاندا بوستاندىق اۋدانىنىڭ وڭتۇستىك بولىگى، سونىڭ ىشىندە ەرمەنساي، «الماتى سۋ» مەملەكەتتىك كاسىپورنىنىڭ قىزمەت كورسەتۋ ايماعىنا كىرمەگەن. سۋمەن جابدىقتاۋمەن جەكە كومپانيالار – «ۆودسناب» ج ش س (بۇرىنعى «ورحان»)، «ەرمەنسايۆودگاز» ج ش س جانە «باۋر لتد» ج ش س اينالىسىپ كەلگەن. الايدا تۇرعىندار بۇل ۇيىمداردىڭ قىزمەت ساپاسىنىڭ تومەندىگى مەن تاريفتەردىڭ جوعارى بولۋىنا بايلانىستى ۇزاق جىل بويى نەگىزدى شاعىم ايتىپ كەلەدى.
قازىرگى ۋاقىتتا «ۆودسناب» جشس-پەن سوت پروسەستەرى جالعاسىپ جاتقانىمەن، اكىمدىك جاعدايدى تۇبەگەيلى جاقسارتۋ جانە سوت شەشىمدەرىن كۇتپەي-اق تۇرعىنداردى ۇزدىكسىز سۋمەن قامتاماسىز ەتۋ ءۇشىن ناقتى باسقارۋشىلىق شەشىم قابىلدادى.
جوبانىڭ نەگىزگى كەزەڭدەرىنىڭ ءبىرى – ءال-فارابي داڭعىلىنان ارايلى كوشەسىنىڭ بويىمەن وتەتىن جاڭا ماگيسترالدى ريەۆەرسيۆتى سۋ قۇبىرىنىڭ قۇرىلىسى بولدى. قۇبىر تارتۋ جۇمىستارى اياقتالعاننان كەيىن بوستاندىق اۋدانى اكىمىنىڭ اپپاراتى تاراتۋ جەلىلەرىن سالادى. بۇل كوشە بويىندا ورنالاسقان تۇرعىن ۇيلەر مەن جەكە سەكتوردى ورتالىقتاندىرىلعان سۋمەن جابدىقتاۋعا جىلدام قوسۋعا مۇمكىندىك بەرەدى.
كەلەشەكتە بۇل ماگيسترالدى سۋ قۇبىرى جوبالانعان «نۇرلىتاۋ» سۋ دايىنداۋ ستانسياسىمەن قوسىلادى. مۇنداي ينجەنەرلىك شەشىم بوستاندىق اۋدانىنىڭ وڭتۇستىك بولىگىندەگى سۋمەن جابدىقتاۋ جۇيەسىنىڭ سەنىمدىلىگى مەن تۇراقتىلىعىن ەداۋىر ارتتىرادى ءارى قالا ينفراقۇرىلىمىنىڭ تۇراقتى دامۋىنا قۇقىقتىق جانە تەحنيكالىق نەگىز قالىپتاستىرادى.