الماتى قالاسى «جيتس الدىن الۋ جانە وعان قارسى كۇرەس ورتالىعى» كەڭەس بەرۋ جانە پروفيلاكتيكالىق كومەك كورسەتۋ ءۇشىن كولىكپەن قامتاماسىز ەتىلدى
28 قاراشا الماتى قالاسى ءجيتس-تىڭ الدىن الۋ جانە وعان قارسى كۇرەس ورتالىعىندا (باسەنوۆ كوشەسى، 2، 4 كورپۋس) دۇنيەجۇزىلىك جيتس-پەن كۇرەس كۇنىنە ارنالعان ناۋقان اياسىندا يۋنەيدس «كوشباسشىلىق – قوعامداستىقتارعا» ۇرانىمەن جىلجىمالى پۋنكتكە ارنالعان جابدىقتالعان كولىكتى تاپسىرۋ ءراسىمى ءوتتى، دەپ حابارلايدى اlmaty-akshamy.kz.
جىلجىمالى پۋنكت – بۇل HYUNDAI H350 بازاسىندا الماتىداعى «Hyundai Com Trans Kazakhstan» ج ش س زاۋىتىندا جاسالعان ارنايى اۆتوكولىك. ول حالىقتىڭ نەگىزگى توپتارىنا، سونداي-اق ايتۆ-مەن اۋىراتىن، ونىڭ ىشىندە تۇزەۋ مەكەمەلەرىندەگى ادامدارعا قىزمەت كورسەتۋ جانە تەستىلەۋ جابدىقتارىمەن جابدىقتالعان. جىلجىمالى پۋنكتتىڭ كومەگىمەن دارىگەرلەر ۇەۇ قىزمەتكەرلەرىمەن بىرلەسىپ ناۋقاستارعا دارى-دارمەكتەردى جەدەل جەتكىزىپ، ەمدەلۋگە مونيتورينگ جۇرگىزۋ ءۇشىن قاجەتتى كونسۋلتاسيالار، تەكسەرۋلەر جۇرگىزە الادى.
حنت وكىلدەرى وزدەرىنىڭ جەرلەرىنە جاقىنىراق ورنالاسقان پروفيلاكتيكالىق باعدارلامالارعا (بۋكلەتتەر، قورعانىس قۇرالدارى جانە ايتۆ-عا تەستىلەۋدەن ءوتۋ مۇمكىندىگى) قول جەتكىزە الادى. كۇن سايىن جىلجىمالى بريگادالار حنت وكىلدەرىمەن الدىن الا كەلىسىلگەن مارشرۋت بويىنشا شىعادى. ءاربىر كەلۋشىگە قۇپيالىلىق پەن انونيمدىلىككە كەپىلدىك بەرىلەدى.
جىلجىمالى پۋنكت جيتس-تىڭ الدىن الۋ جانە وعان قارسى كۇرەس ورتالىعىنىڭ ماماندارىنا قوعامدىق ۇيىمدارمەن بىرلەسىپ حنت، ايتۆ-مەن اۋىراتىن ادامداردى جانە ولاردىڭ سەرىكتەستەرىن پروفيلاكتيكالىق باعدارلامالارمەن جانە مەديسينالىق قىزمەتتەرمەن قامتۋدى ۇلعايتۋعا مۇمكىندىك بەرەدى. بۇل حالىقتىڭ نەگىزگى توپتارى اراسىندا ءجيى تىركەلەتىن ايتۆ-نىڭ جاڭا جاعدايلارىن ازايتۋ ءۇشىن وتە ماڭىزدى، - دەپ اتاپ ءوتتى الماتى قالاسى جيتس ورتالىعىنىڭ باس دارىگەرى مارات تۇكەيەۆ.
جىلجىمالى پۋنكتتى ساتىپ الۋدى «ايتۆ ەپيدەدەمياسىن باقىلاۋدىڭ الماتى مودەلى» جوباسىمەن جۇزەگە اسىردى. جوبانىڭ ماقساتى الماتىدا ايتۆ ەپيدەمياسىن باقىلاۋ بويىنشا تۇراقتى، كەشەندى، ەكونوميكالىق ءتيىمدى قالالىق باعدارلامانى قۇرۋ جانە ونى ىسكە اسىرۋ بولىپ تابىلادى. ءۇش جىل ىشىندە جوبا ايتۆ-ينفەكسياسىنىڭ الدىن الۋ، تەستىلەۋ مەن ەمدەۋدە يننوۆاسيالىق تاسىلدەردى ەنگىزۋدە. جوبانىڭ قىزمەتتەرىن حنت-نىڭ 17 مىڭنان استام وكىلى الدى، 11 مىڭنان استامى ايتۆ-عا تەكسەرىلدى، ونىڭ ىشىندە 8 مىڭنان استامى ۇەۇ بازاسىندا سىنالدى. ايتۆ-ينفەكسياسىنىڭ 142 جاڭا جاعدايى انىقتالدى، ونىڭ 95%-ى ەمدەۋدى باستادى.
مەملەكەتتىك جانە ۇكىمەتتىك ەمەس ۇيىمداردىڭ تىعىز ءوزارا ءىس-قيمىلىنىڭ ارقاسىندا جوبا اياقتالعاننان كەيىن جيتس ورتالىعى مەن ۇەۇ ماماندارىنىڭ ءموبيلدى كوپسالالى توبى ايتۆ-مەن اۋىراتىن ادامدارعا جانە حالىقتىڭ نەگىزگى توپتارىنا قىزمەتتەر كەشەنىن كورسەتۋدى جالعاستىرادى، - دەدى ەۋرازيا ەلدەرىندەگى ICAP وڭىرلىك ديرەكتورى اننا دەريابينا.
«كوشباسشىلىق – قاۋىمداستىقتارعا» يۋنەيدس ۇرانىمەن دۇنيەجۇزىلىك جيتس-پەن كۇرەس كۇنىنە ارنالعان ناۋقان قازاقستاندا 20 قاراشادان 1 جەلتوقسانعا دەيىن ۇەۇ-عا جانە ايتۆ-نى ەڭسەرۋدەگى قاۋىمداستىققا نازار اۋدارۋ ماقساتىندا وتكىزىلەدى. قاۋىمداستىقتار قوعامدىق دەنساۋلىق ساقتاۋ قىزمەتىنە قاتىستى ادامداردى بايلانىستىرادى، سەنىمدىلىكتى ارتتىرادى، جاڭاشىلدىق جاسايدى.