سايت ءۇش تىلدە جۇرگىزىلەدى.
الماتى وبلىسى اقسۋ اۋدانى جانسۇگىروۆ اۋىلىندا ج.سىدىقوۆ اتىنداعى ورتا مەكتەپتىڭ 7 «ب» سىنىپ وقۋشىسى تيمۋر بريجانوۆ ءوز مەكتەبىنىڭ رەسمي سايتىن جاساپ شىقتى، دەپ حابارلايدى Almaty-akshamy.kz.
«تيمۋر بريجانوۆ وسى جوباسىمەن وبلىستىق «مەنىڭ وتانىما – مەنىڭ باستامام» شىعارماشىلىق جوبالار بايقاۋىندا «مەدياجوبالار» باعىتى بويىنشا جۇلدەلى ءىى ورىن يەگەرى اتاندى»، – دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.
تيمۋر بريجانوۆتىڭ ايتۋىنا، ول سايت جاساۋدى Youtube جەلىسىنەن كورىپ ۇيرەنگەن.
«جەتەكشىم، ينفورماتيكا ءپانىنىڭ ءمۇعالىمى گۇلجان قۇلىنبايەۆانىڭ باعىت بەرۋىمەن قوسىمشا ادەبيەتتەردى وقىپ، سايت جاساۋعا ارنالعان تەگىن Github حوستينگىن پايدالاندىم. سايت ءۇش تىلدە جۇرگىزىلەدى. الداعى ۋاقىتتا مازمۇنى مەن فورماتىن ءالى دە جەتىلدىرسەم دەيمىن»، - دەيدى تيمۋر بريجانوۆ.
سايتقا كىرۋشىلەر مەكتەپتىڭ تاريحىمەن، تىنىس-تىرشىلىگىمەن، ۇجىم قۇرامىمەن، سوڭعى جاڭالىقتارمەن تانىسا الادى. جاس ونەرتاپقىشتىڭ ايتۋىنشا، بولاشاقتا ونلاين كىتاپحانا قۇرۋ قولعا الىنادى. مەكتەپتىڭ سايتىنا QR كود ارقىلى كىرۋ جوسپارلانىپ وتىر.
«وقۋشىم سايت جاساۋ تۋرالى ۇسىنىس ءبىلدىردى. ءسويتىپ، ەكەۋمىز بۇل ىسكە بىرلەسە كىرىستىك، مەن نەگىزىنەن باعىت بەرىپ وتىردىم. مەكتەپتىڭ تاريحي مالىمەتتەرىن جيناقتاۋعا، باسقا دا قاجەتتى اقپاراتتاردى ءۇش تىلدە تولىقتىرۋعا مەكتەپ باسشىلىعى كومەكتەستى. سايتتى ازىرلەۋگە ەكى جىلداي ۋاقىت كەتتى. بالالار جىلىندا بۇل ءبىزدىڭ مەكتەپ ءۇشىن ۇلكەن قۋانىش بولىپ وتىر. بۇگىنگى تاڭدا مەكتەپتەگى تالاپتى وقۋشىلارعا قوسىمشا ساباقتار جۇرگىزۋدى جوسپارلاپ وتىرمىز. بۇل رەتتە ماعان تيمۋر بريجانوۆ بىلىكتى كومەكشى بولىپ ءجۇر. قازىرگى كەزدە سايت جاساۋعا دەگەن قىزىعۋشىلىعى بار 8-10 سىنىپ وقۋشىلارىنان توپ قۇردىق. ولارعا اپتاسىنا ەكى رەت ساباق جۇرگىزىلەدى»، - دەدى گۇلجان قۇلىنبايەۆا.
اقسۋ اۋداندىق اكىمدىگىنىڭ حابارلاۋىنشا، مەكتەپ سايتىن قولعا العانعا دەيىن تيمۋر بريجانوۆ سانيتارلىق اۆياسيا سالاسىندا قولدانىلاتىن تىكۇشاق ماكەتىن قۇراستىرعان. وسى جوباسىمەن «ۇلى ونەرتاپقىشتىققا العاشقى قادام» يننوۆاسيالىق يدەيالاردىڭ وبلىستىق بايقاۋىندا «اۆياسيا سالاسىنداعى جوبالار» نوميناسياسى بويىنشا جۇلدەلى 1ء-شى ورىن يەگەرى اتانىپتى. تيمۋر بولاشاقتا تەحنيك-باعدارلاماشى بولۋدى ارماندايدى. ول ارمانىنا جەتۋگە قازىردەن-اق قادام جاساپ كەلەدى.
تيمۋردىڭ تاعى ءبىر جوسپارى - بولاشاقتا دۇكەندەرگە ارناپ سايت جاساۋ. وسى ارقىلى تۇتىنۋشى اۋىلداعى بارلىق دۇكەندەردەگى قاجەتتى ازىق-تۇلىك باعاسىن ساراپتاپ، ارزانىن تاڭداۋعا مۇمكىندىك الادى دەپ ەسەپتەيدى. سونىمەن قاتار ۇيدە وتىرىپ، قاجەتتى تاۋارعا ونلاين تاپسىرىس بەرۋگە مۇمكىندىك جاساۋ كوزدەلۋدە.
اتاپ وتەرلىگى، وبلىستاعى مەكتەپتەردە 227 روبوتوتەحنيكا ۇيىرمەسى جۇمىس ىستەيدى. ولاردا 2500-گە جۋىق بالا ءدارىس الۋدا. سول سياقتى زاماناۋي تەحنيكامەن جانە ءتيىستى باعدارلامالارمەن قامتاماسىز ەتىلگەن 119 ءىت-سىنىپ پەن 21 STEM كابينەتتەرىنىڭ قىزمەتى وقۋشىلاردىڭ سيفرلىق ساۋاتتىلىعىن قالىپتاستىرىپ، جاڭا يدەيالارمەن جۇمىس ىستەۋ ماشىعىن جەتىلدىرۋدە.